കോട്ടയം: ശബരിമല മണ്ഡല മകരവിളക്ക് മഹോത്സവത്തോടനുബന്ധിച്ച് കോട്ടയം ജില്ലയിലും പ്രധാന ഇടത്താവളമായ എരുമേലിയിലും നടപ്പിലാക്കുന്ന മുന്നൊരുക്കങ്ങൾ വിലയിരുത്തി കളക്ടറേറ്റിൽ അവലോകന യോഗം ചേർന്നു. ജില്ലാ കളക്ടറുടെ അധ്യക്ഷതയിൽ ചേർന്ന യോഗത്തിൽ വിവിധ വകുപ്പ് മേധാവികൾ പങ്കെടുത്തു.
തീർത്ഥാടന കാലത്ത് കോട്ടയത്തും പ്രത്യേകിച്ച് എരുമേലിയിലും എത്തുന്ന ലക്ഷക്കണക്കിന് ഭക്തജനങ്ങൾക്ക് ആവശ്യമായ അടിസ്ഥാന സൗകര്യങ്ങൾ, കുടിവെള്ള വിതരണം, വെളിച്ചം, ശുചിത്വ സജ്ജീകരണങ്ങൾ എന്നിവ പൂർത്തിയായതായി യോഗം വിലയിരുത്തി. എരുമേലിയിലെ പേട്ടതുള്ളൽ പാത, വലിയമ്പലം, ചെറിയമ്പലം എന്നിവിടങ്ങളിലെ പ്രാഥമിക കാര്യങ്ങളും സുരക്ഷാ ക്രമീകരണങ്ങളും പൂർണ്ണസജ്ജമാക്കിയിട്ടുണ്ട്.
പോലീസ്, മോട്ടോർ വാഹന വകുപ്പ്, ആരോഗ്യ വകുപ്പ്, കെ.എസ്.ആർ.ടി.സി, തദ്ദേശ സ്വയംഭരണ സ്ഥാപനങ്ങൾ, ഫയർഫോഴ്സ്, ഭക്ഷ്യസുരക്ഷാ വകുപ്പ് എന്നിവയുടെ നേതൃത്വത്തിൽ ഇതുവരെ പൂർത്തിയാക്കിയ പ്രവൃത്തികൾ യോഗത്തിൽ വിശദീകരിച്ചു. തീർത്ഥാടകരുടെ യാത്ര സുഗമമാക്കാൻ ഇടത്താവളങ്ങളിൽ അടിയന്തര വൈദ്യസഹായ കേന്ദ്രങ്ങളും കൂടുതൽ കെ.എസ്.ആർ.ടി.സി സർവീസുകളും ലഭ്യമാക്കുമെന്നും കളക്ടർ അറിയിച്ചു.
