റിയാദ്: സൗദി അറേബ്യയിലെ തന്ത്രപ്രധാന കേന്ദ്രങ്ങൾ ലക്ഷ്യമിട്ട് ഡ്രോണുകളും ബാലസ്റ്റിക് മിസൈലുകളും ഉപയോഗിച്ച് രൂക്ഷമായ ആക്രമണം നടത്തിയതായി യെമനിലെ ഇറാൻ പിന്തുണയുള്ള ഹൂതി വിമതർ. തലസ്ഥാനമായ റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളം, അബഹ അന്താരാഷ്ട്ര വിമാനത്താവളം, റാബിഗിലെ പ്രമുഖ എണ്ണക്കമ്പനിയായ അരാംകോയുടെ (Aramco) റിഫൈനറി എന്നിവയ്ക്ക് നേരെയാണ് ആക്രമണം നടത്തിയതെന്ന് ഹൂതി സൈനിക വക്താവ് യഹ്യ സരീ അവകാശപ്പെട്ടു.
മെക്ക പ്രതിരോധ ഉടമ്പടിയുടെ ഭാഗമായി സൗദിയെ സംരക്ഷിക്കാൻ പാക്കിസ്ഥാനും തുർക്കിയും സൈന്യത്തെ വിന്യസിക്കാൻ തീരുമാനിച്ചതിന് പിന്നാലെയാണ് ഹൂതികളുടെ ഈ നീക്കം. തങ്ങളുടെ സൈനിക താവളങ്ങൾക്കും ആഭ്യന്തര സുരക്ഷയ്ക്കും ഭീഷണിയാകുന്ന ആക്രമണങ്ങൾക്ക് കനത്ത തിരിച്ചടി നൽകുമെന്ന് സൗദി അറേബ്യയും സഖ്യസേനയും മുന്നറിയിപ്പ് നൽകിയിട്ടുണ്ട്.
ആക്രമണത്തെ തുടർന്ന് റിയാദ്, അബഹ വിമാനത്താവളങ്ങളിലെ വിമാന സർവീസുകൾ താൽക്കാലികമായി നിർത്തിവെക്കുകയും സുരക്ഷ ശക്തമാക്കുകയും ചെയ്തു. ഇതിനിടെ യെമനിൽ സർക്കാർ സേനയും സഖ്യസേനയും ചേർന്ന് ഹൂതികൾക്ക് നേരെ കരമാർഗ്ഗവും വ്യോമമാർഗ്ഗവും ആക്രമണം കടുപ്പിച്ചിട്ടുണ്ട്. പോരാട്ടം രൂക്ഷമായതോടെ മേഖലയിൽ യുദ്ധഭീതി വർദ്ധിച്ചിരിക്കുകയാണ്.
