കൊച്ചി: സീറോമലബാർ സഭയിൽ ഈ വർഷം മുതൽ ഒക്ടോബർ മാസം മിഷൻ മാസമായി ആചരിക്കും. സഭാ ആസ്ഥാനമായ കാക്കനാട് മൗണ്ട് സെന്റ് തോമസിൽ നടന്ന ചടങ്ങിൽ തിരി തെളിയിച്ച് മേജർ ആർച്ച്ബിഷപ് മാർ റാഫേൽ തട്ടിൽ മിഷൻ മാസാചരണത്തിന്റെ ഉദ്ഘാടനം നിർവഹിച്ചു.
നേരത്തെ ജനുവരി മാസത്തിൽ ആചരിച്ചിരുന്ന മിഷൻ വാരത്തിന് പകരമായാണ് സിനഡ് തീരുമാനപ്രകാരം ഇനി മുതൽ ഒക്ടോബർ മാസം മുഴുവൻ മിഷൻ മാസമായി ആചരിക്കാൻ തീരുമാനിച്ചത്. ആഗോള സഭയോട് ചേർന്നുനിന്നുകൊണ്ട് സുവിശേഷ പ്രഘോഷണത്തിനും പ്രേഷിത പ്രവർത്തനങ്ങൾക്കും മുൻഗണന നൽകുകയാണ് ഇതിലൂടെ ലക്ഷ്യമിടുന്നത്.
ഒക്ടോബർ മാസത്തിൽ സഭയിലുടനീളമുള്ള ഇടവകകളിലും കുടുംബക്കൂട്ടായ്മകളിലും പ്രത്യേക പ്രേഷിത പ്രാർത്ഥനകളും സാമ്പത്തിക സഹായ സമാഹരണവും സംഘടിപ്പിക്കും.
