റബാത്ത്: ആഫ്രിക്കൻ രാജ്യമായ മൊറോക്കയിൽ ചരിത്രത്തിൽ ആദ്യമായി വനിതാ പ്രധാനമന്ത്രി അധികാരത്തിലേക്ക്. ഫാത്തിമ എസാറ എൽ മൻസൂരിയെയാണ് (Fatima Ezzahra El Mansouri) രാജ്യത്തിന്റെ പ്രധാനമന്ത്രിയായി മുഹമ്മദ് ആറാമൻ രാജാവ് നിയമിച്ചത്.
അമ്പതുകാരിയായ ഫാത്തിമ അറബ് ലോകത്തെ മൂന്നാമത്തെ വനിതാ പ്രധാനമന്ത്രിയെന്ന അപൂർവ്വ നേട്ടത്തിനും അർഹയായി. പാർലമെന്റ് തിരഞ്ഞെടുപ്പിൽ ലിബറൽ-സെൻട്രിസ്റ്റ് പാർട്ടിയായ ഓതെന്റിസിറ്റി ആൻഡ് മോഡേണിറ്റി പാർട്ടി (PAM) കൈവരിച്ച വൻ വിജയത്തിന് പിന്നാലെയാണ് നിയമനം.
നേരത്തെ മറക്കേഷിന്റെ ആദ്യ വനിതാ മേയറായും നഗരാസൂത്രണ-ഭവനനിർമ്മാണ മന്ത്രിയായും സേവനമനുഷ്ഠിച്ചിട്ടുള്ള പ്രമുഖ അഭിഭാഷക കൂടിയാണ് ഫാത്തിമ എസാറ. രാജ്യത്തെ സാമ്പത്തിക വളർച്ച ഉറപ്പാക്കുക, തൊഴിലവസരങ്ങൾ സൃഷ്ടിക്കുക, സാമൂഹിക പുരോഗതി കൈവരിക്കുക എന്നിവയാണ് തന്റെ സർക്കാരിന്റെ പ്രധാന ലക്ഷ്യമെന്ന് പ്രധാനമന്ത്രിയായി ചുമതലയേറ്റ ശേഷം അവർ വ്യക്തമാക്കി.
