കൊച്ചി: 1995-ലെ വഖഫ് നിയമത്തിലെ വകുപ്പ് 14(6) പ്രകാരമുള്ള പ്രാതിനിധ്യ നിർണ്ണയ പ്രക്രിയ പൂർത്തിയാക്കി സംസ്ഥാന വഖഫ് ബോർഡ് പുനഃസംഘടിപ്പിക്കുന്നതിനുള്ള നടപടികൾ ആരംഭിച്ചതായി സംസ്ഥാന സർക്കാർ ഹൈക്കോടതിയെ അറിയിച്ചു. നടപടിക്രമങ്ങൾ പൂർത്തിയാക്കുന്നതിനായി രണ്ടാഴ്ചത്തെ സമയം കൂടി അനുവദിക്കണമെന്ന് ആവശ്യപ്പെട്ട് റവന്യൂ വകുപ്പ് അഡീഷണൽ ചീഫ് സെക്രട്ടറി എ.പി.എം. മുഹമ്മദ് ഹനീഷ് സമർപ്പിച്ച അഡീഷണൽ എതിർ സത്യവാങ്മൂലവും ഹൈക്കോടതി പരിഗണിച്ചു.
ചീഫ് ജസ്റ്റിസ് സൗമെൻ സെൻ, ജസ്റ്റിസ് വി.എം. ശ്യാംകുമാർ എന്നിവരടങ്ങുന്ന ഡിവിഷൻ ബെഞ്ചാണ് ഹർജികൾ പരിഗണിച്ചത്. സർക്കാരിനു വേണ്ടി അഡ്വക്കറ്റ് ജനറൽ ജാജു ബാബു ഹാജരായി രണ്ടാഴ്ചത്തെ സമയം ചോദിച്ചു.
വിഷയത്തിൽ കൂടുതൽ വിവരങ്ങൾ വ്യക്തമാക്കി രണ്ടാഴ്ചയ്ക്കകം വിശദമായ സത്യവാങ്മൂലം സമർപ്പിക്കാൻ നിർദ്ദേശിച്ച ഹൈക്കോടതി, ഹർജികൾ വീണ്ടും ഒക്ടോബർ 30-ന് പരിഗണിക്കാനായി മാറ്റി. ബോർഡിൽ അമുസ്ലിം സാന്നിധ്യവും ഷിയാ വിഭാഗം അടക്കമുള്ളവരുടെ പ്രാതിനിധ്യവും സംബന്ധിച്ച് ഉയർന്ന തർക്കങ്ങളും ചോദ്യങ്ങളും ഉന്നയിക്കുന്ന ഒരു കൂട്ടം ഹർജികളാണ് നിലവിൽ കോടതിയുടെ പരിഗണനയിലുള്ളത്.
