കോട്ടയം: അടിസ്ഥാന സൗകര്യവികസനത്തിൽ പിന്നാക്കം നിൽക്കുന്ന പ്രദേശങ്ങൾക്ക് പ്രത്യേക പരിഗണന നൽകുന്നതാണ് സർക്കാരിന്റെ നയമെന്ന് പൊതുമരാമത്ത് വകുപ്പ് മന്ത്രി പി.കെ. ബഷീർ പറഞ്ഞു. കോട്ടയത്ത് കൊതവറ പാലത്തിന്റെ നിർമ്മാണോദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.
അപ്രോച്ച് റോഡിനുള്ള സ്ഥലം ലഭ്യമാക്കിയാൽ അനിവാര്യമായ സ്ഥലങ്ങളിലെല്ലാം പാലങ്ങൾ നിർമിച്ചുനൽകാൻ പൊതുമരാമത്ത് വകുപ്പ് തയ്യാറാണെന്ന് മന്ത്രി വ്യക്തമാക്കി. സ്ഥലം ഏറ്റെടുക്കൽ ബുദ്ധിമുട്ടുള്ളതിനാൽ റോഡ് വികസനത്തിൽ എലിവേറ്റഡ് ഹൈവേകളാണ് കൂടുതൽ അനുയോജ്യമെന്നും അദ്ദേഹം കൂട്ടിച്ചേർത്തു.
ചടങ്ങിൽ കെ. ബിനിമോൻ എം.എൽ.എ അധ്യക്ഷത വഹിച്ചു. അഡ്വ. കെ. ഫ്രാൻസിസ് ജോർജ് എം.പി മുഖ്യപ്രഭാഷണം നടത്തി. വൈക്കം നഗരസഭ അധ്യക്ഷൻ അബ്ദുൾ സലാം റാവുത്തർ, വൈക്കം ബ്ലോക്ക് പഞ്ചായത്ത് പ്രസിഡന്റ് കെ.കെ. ശശികുമാർ, തലയാഴം ഗ്രാമപഞ്ചായത്ത് പ്രസിഡന്റ് ലിജി സലഞ്ച് രാജ്, മറ്റ് ജനപ്രതിനിധികൾ, പി.ഡബ്ല്യു.ഡി ഉദ്യോഗസ്ഥർ, രാഷ്ട്രീയ പാർട്ടി പ്രതിനിധികൾ തുടങ്ങിയവർ പങ്കെടുത്തു.
നാട്ടുകാരുടെ യാത്രാക്ലേശത്തിന് പരിഹാരമാകും: തലയാഴം ഗ്രാമപഞ്ചായത്തിലെ വൈക്കം-വെച്ചൂർ റോഡിലുള്ള മൂന്ന് മീറ്റർ മാത്രം വീതിയുള്ള പഴയ കൊതവറ പാലം ജീർണിച്ച് അപകടാവസ്ഥയിലായിരുന്നു. പുതിയ പാലം യാഥാർത്ഥ്യമാകുന്നതോടെ ഉല്ലല, കൊതവറ പ്രദേശവാസികളുടെ യാത്രാദുരിതത്തിന് പൂർണ്ണ പരിഹാരമാകും.
3.25 കോടി രൂപ ചെലവഴിച്ചാണ് പുതിയ പാലം നിർമിക്കുന്നത്. 5.50 മീറ്റർ കാരിയേജ് വേയും 1.50 മീറ്റർ നടപ്പാതയും ഉൾപ്പെടെ ആകെ 7.75 മീറ്റർ വീതിയിൽ 13.90 മീറ്റർ നീളത്തിലാണ് സിംഗിൾ സ്പാൻ പാലം പണിയുന്നത്. പാലത്തിന്റെ ഇരുവശങ്ങളിലും 60 മീറ്റർ നീളത്തിൽ അപ്രോച്ച് റോഡുകളും നിർമിക്കും. കാക്കനാട് ആസ്ഥാനമായ എ.എ. ആൻഡ് എസ്. കൺസ്ട്രക്ഷൻസാണ് നിർമാണച്ചുമതല ഏറ്റെടുത്തിരിക്കുന്നത്.
