ന്യൂഡൽഹി: ഗ്രേറ്റ് നിക്കോബാർ ദ്വീപിലെ ബൃഹത്തായ വികസന പദ്ധതികൾക്കെതിരെ (Great Nicobar Development Project) കൊൽക്കത്ത ഹൈക്കോടതിയിൽ നടക്കുന്ന കേസ് നടപടികൾ നിർത്തിവെക്കണമെന്ന കേന്ദ്രസർക്കാരിന്റെ ആവശ്യം സുപ്രീം കോടതി തള്ളി. പ്രാദേശിക ഗോത്രവർഗ്ഗക്കാരായ ശോമ്പൻ, നിക്കോബാറീസ് വിഭാഗങ്ങളുടെ തനിമയും സംസ്കാരവും കാത്തുസൂക്ഷിക്കുന്നത് ഭരണഘടന ഉറപ്പുനൽകുന്ന മൗലികാവകാശങ്ങളുടെ പരിധിയിൽ വരുന്നതാണെന്ന് സുപ്രീം കോടതി വ്യക്തമാക്കി.
ദ്വീപിൽ നിർദ്ദേശിക്കപ്പെട്ടിട്ടുള്ള അന്താരാഷ്ട്ര കണ്ടെയ്നർ ട്രാൻസ്ഷിപ്പ്മെന്റ് പോർട്ട്, അന്താരാഷ്ട്ര വിമാനത്താവളം, പവർ പ്ലാന്റ്, ടൗൺഷിപ്പ് എന്നിവ ഉൾപ്പെടുന്ന പദ്ധതികൾ പരിസ്ഥിതിക്കും തദ്ദേശീയ ഗോത്രവിഭാഗങ്ങളുടെ നിലനിൽപ്പിനും ഭീഷണിയാണെന്ന് ചൂണ്ടിക്കാട്ടിയാണ് കൊൽക്കത്ത ഹൈക്കോടതിയിൽ ഹർജികൾ എത്തിയത്. പദ്ധതി തന്ത്രപ്രധാനമാണെന്നും കൊൽക്കത്ത ഹൈക്കോടതിയിലെ നടപടികൾ തടയണമെന്നും ചൂണ്ടിക്കാട്ടിയാണ് കേന്ദ്ര സർക്കാർ സുപ്രീം കോടതിയെ സമീപിച്ചത്.
എന്നാൽ, പരിസ്ഥിതിയും തദ്ദേശീയ ജനവിഭാഗങ്ങളുടെ അവകാശങ്ങളും സംരക്ഷിക്കപ്പെടേണ്ടതുണ്ടെന്ന് ചൂണ്ടിക്കാട്ടിയ സുപ്രീം കോടതി, വിഷയത്തിൽ ഹൈക്കോടതി തന്നെ തുടർവാദം കേൾക്കട്ടെ എന്ന് വ്യക്തമാക്കി കേന്ദ്രത്തിന്റെ ഹർജി തള്ളുകയായിരുന്നു.
