ഏറ്റുമാനൂര് : പുന്നത്തുറ വെസ്റ്റ് മണിമലകാവ് ദേവീക്ഷേത്രത്തിലെ തിരുവുത്സവവും തൃക്കൊടിയേറ്റും, ഉത്സവബലിദര്ശനവും ആറാട്ടും 13-ാമത് പ്രതിഷ്ഠാവാര്ഷികവും വിവിധങ്ങളായ ക്ഷേത്രചടങ്ങുകളോടും കലാപരിപാടികളോടും കൂടി ഭക്ത്യാദരപൂര്വ്വം മെയ് 7 മുതല് 13 വരെ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു.
കൊടിയും കൊടിക്കൂറയും മെയ് 7 ന് ചെങ്ങളത്തുനിന്നും ഉച്ചകഴിഞ്ഞ് 3 ന് രഥഘോഷയാത്രയായി പുറപ്പെട്ട് വൈകിട്ട് 5 ന് ഏറ്റുമാനൂര് ശ്രീമഹാദേവ ക്ഷേത്രമൈതാനിയില് എത്തിച്ചേരുമ്പോള് തിരുവിതാംകുര് ദേവസ്വം ബോര്ഡിന്റെയും ക്ഷേത്ര ഉപദേശക സമിതിയുടെയും നേതൃത്വത്തില് സ്വീകരണം. തുടര്ന്ന് വാദ്യമേളങ്ങളുടെയും ഇരുചക്രവാഹനങ്ങളുടെയും അകമ്പടിയോടെ മാടപ്പാട്, തണ്ടുവള്ളി, കറ്റോട് കക്കയം കാണിക്കവഞ്ചി, കണ്ണംപുര എന്നിവിടങ്ങളില് വിവിധ ഹൈന്ദവ സംഘടനകളുടെ നേതൃത്വത്തില് സ്വീകരണം. തുടര്ന്ന് പട്ടര്മഠം ആല്ത്തറയില് നിന്നും താലപ്പൊലിയുടെ അകമ്പടിയോടെ ക്ഷേത്രത്തില് എത്തിച്ചേരും. ക്ഷേത്രം തന്ത്രിയും മേല്ശാന്തിയും ചേര്ന്ന് ഏറ്റുവാങ്ങും.
2026 മെയ് 7 വ്യാഴാഴ്ച രാവിലെ 8 മണിക്ക് ആമേടമന വിഷ്ണു നമ്പൂതിരിയുടെ മുഖ്യകാര്മ്മികത്വത്തില് സര്പ്പപൂജ. പ്രസാദ ഊട്ട്. വൈകിട്ട് 7 ന് ട്രസ്റ്റ് പ്രസിഡന്റ് ശിവശങ്കരന് നായരുടെ അദ്ധ്യക്ഷതയില് ചേരുന്ന സമ്മേളനത്തിൽ ക്ഷേത്രം തന്ത്രി കുരുപ്പക്കാട്ട് മനയ്ക്കല് നാരായണന് നമ്പുതിരി ഭദ്രദീപ പ്രകാശനം നടത്തും. സമ്മേളനം ഉദ്ഘാടനം നഗരസഭ ചെയര്പേഴ്സണ് ടോമി പുളിമാന്തുണ്ടവും കലാപരിപാടികളുടെ ഉദ്ഘാടനം സിനിമ സീരിയല് താരം നീന കുറുപ്പ് നിര്വ്വഹിക്കും. ജീവകാരുണ്യപ്രവര്ത്തകന് അച്ചായന്സ് ഗോള്ഡ് ഉടമ ടോണി വര്ക്കിച്ചനെ മണിമലക്കാവ് ദേവസ്വത്തിന്റെ ആദരം.
നമ്മുടെ നാടും നഗരവും മനോഹരമാക്കുന്ന ഏറ്റുമാനൂര് മുനിസിപ്പാലിറ്റിയിലെ മുഴുവന് കണ്ടിജന്സ് ജീവനക്കാര്ക്കും മണിമലക്കാവ് ദേവസ്വത്തിന്റെ ആദരം. കലാ-സാംസ്കാരിക രംഗത്തെ പ്രതിഭകളെ ആദരിക്കുകയും ചെയ്യും. തുടര്ന്ന് ചികിത്സാ സാഹായവിതരണം വാര്ഡ് കൗണ്സിലര് ജിഷ പ്രദീപ് നിര്വ്വഹിക്കും. വിദ്യാഭ്യാസ അവാര്ഡ് വിതരണം ക്ഷേത്രം മേല്ശാന്തി മഹേഷ് ദാമോദരന് നമ്പൂതിരി നിര്വ്വഹിക്കും. മുനിസിപ്പല് സ്റ്റാന്ഡിംഗ് കമ്മറ്റി ചെയര്പേഴ്സണ്മാരായ പ്രിയ സജീവ്, ബിബിന് ബാബു, കൗണ്സിലര്മാരായ റ്റി പി മോഹന്ദാസ്, അമ്പിളി ശ്രീകുമാരന്, ട്രസ്റ്റ് വനിതാസംഘം പ്രസിഡന്റ് ഭാര്ഗ്ഗവി ബി നായര്, ട്രസ്റ്റ് യൂത്ത് വിംഗ് പ്രസിഡന്റ് സുജിത് എം ചെല്ലപ്പന് വിവിധ സമുദായ സംഘടന പ്രതിനിധികള് സംസാരിക്കും.
മെയ് 8 വെള്ളിയാഴ്ച വൈകിട്ട് 5.30നും 6.15നും മദ്ധ്യയുള്ള ശുഭമുഹൂര്ത്തത്തില് ക്ഷേത്രം തന്ത്രി കുരുപ്പക്കാട്ട് മനയ്ക്കല് നാരായണന് നമ്പൂതിരി, മേല്ശാന്തി മുട്ടത്തുമന മഹേഷ് ദാമോദരന് നമ്പൂതിരി എന്നിവരുടെ മുഖ്യ കാര്മ്മികത്വത്തില് തൃക്കൊടിയേറ്റ്. തുടര്ന്ന് കലാപരിപാടികള്, പ്രസാദ ഊട്ട്.
മെയ് 12 ന് ഉച്ചയ്ക്ക് 12 ന് ഉത്സവബലി ദര്ശനം. തുടര്ന്ന് പ്രസാദ ഊട്ട്. വൈകിട്ട് 8 മുതല് വിളക്കിനെഴുന്നള്ളിപ്പ്, ഐമ്പറ, വലിയ കാണിക്ക. മെയ് 13 ന് രാവിലെ 7 ന് പൊങ്കാല. വൈകിട്ട് 4 ന് ആറാട്ട് പൂജ തുടര്ന്ന് ആറാട്ട് പുറപ്പാട്. കറ്റോട് കക്കയം കാണിക്കമണ്ഡപം, കണ്ണംപുര, ആറുമാനൂര്, പട്ടര്മഠം ആല്ത്തറ വഴി പട്ടര്മഠം ആറാട്ട് കടവില് പൂജ. തുടര്ന്ന് ആറാട്ട് സദ്യ. 9 ന് ചേര്ത്തല ഉദയപ്പനാശാന്റെ പ്രമാണത്തില് പാണ്ടിമേളത്തിന്റെ അകമ്പടിയോടെ ആറാട്ട് എതിരേല്പ്പ്. തുടര്ന്ന് കൊടിയിറക്ക്. വാര്ഷിക കലശം.
മെയ് 7 മുതല് 13 വരെ തിരുവരങ്ങില് ഓട്ടന്തുള്ളല്, കൈകൊട്ടിക്കളി, തിരുവാതിരകളി, ഡാന്സ്, നൃത്തനൃത്യങ്ങള്, ഭജന്സ്, വയലിന് ഫ്യൂഷന്, നാടന്പാട്ട്, വില്പ്പാട്ട് എന്നിവയും ഉണ്ടായിരിക്കുന്നതാണ്. പത്രസമ്മേളനത്തില് ട്രസ്റ്റ് പ്രസിഡന്റ് ശിവശങ്കരന് നായര് (ജയന്പിള്ള), സെക്രട്ടറി ചന്ദ്രബാബു ആലയ്ക്കല്, വൈസ് പ്രസിഡന്റ് സുരേഷ് കൊറ്റോത്ത്, രക്ഷാധികാരി പ്രസാദ് പനമറ്റം, ട്രസ്റ്റ് വനിതാസംഘം പ്രസിഡന്റ് ഭാര്ഗ്ഗവി ബി. നായര്, യൂത്ത് വിംഗ് സെക്രട്ടറി രോഹിത് എം സാബു എന്നിവര് പങ്കെടുത്തു.
