ന്യൂഡൽഹി: തീവ്ര വോട്ടർപട്ടിക പരിഷ്കരണത്തിലെ (SIR) ഗുരുതര ക്രമക്കേടുകളുടെ പശ്ചാത്തലത്തിൽ ചീഫ് ഇലക്ഷൻ കമ്മീഷണർ ഗ്യാനേഷ് കുമാറിനെ ഉടൻ സ്ഥാനത്തുനിന്ന് നീക്കണമെന്ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ. തെരഞ്ഞെടുപ്പ് കമ്മീഷനുമേൽ അനാവശ്യ സമ്മർദ്ദം ചെലുത്തിയതിന്റെ ധാർമ്മിക ഉത്തരവാദിത്തമേറ്റെടുത്ത് പ്രധാനമന്ത്രി നരേന്ദ്ര മോദി രാജി വെക്കണമെന്നും ഖാർഗെ ആവശ്യപ്പെട്ടു. കോൺഗ്രസ് വർക്കിങ് കമ്മിറ്റി (CWC) യോഗത്തിലാണ് അദ്ദേഹം കേന്ദ്ര സർക്കാരിനും ഇലക്ഷൻ കമ്മീഷനുമെതിരെ രൂക്ഷവിമർശനം ഉന്നയിച്ചത്.
ചീഫ് ഇലക്ഷൻ കമ്മീഷണർ ഭരണപക്ഷത്തിന്റെ “പാവ”യായി പ്രവർത്തിക്കുകയാണെന്നും ജനാധിപത്യ സ്ഥാപനങ്ങളുടെ വിശ്വാസ്യത തകർക്കുകയാണെന്നും ഖാർഗെ ആരോപിച്ചു. വോട്ടർപട്ടികയിൽ നിന്ന് വ്യാപകമായി ആളുകളെ ഒഴിവാക്കുന്നതും ഒരേ വോട്ടർമാരുടെ പേരുകൾ ഇരട്ടിപ്പായി ചേർക്കുന്നതും വോട്ടവകാശം നിഷേധിക്കുന്നതിന് തുല്യമാണ്. കമ്മീഷന്റെ തീരുമാനങ്ങളിൽ മറ്റ് ഇലക്ഷൻ കമ്മീഷണർമാർക്ക് ഭിന്നതയുണ്ടെന്ന വിവരങ്ങൾ പുറത്തുവന്ന സാഹചര്യത്തിൽ ചീഫ് ഇലക്ഷൻ കമ്മീഷണർക്ക് സ്ഥാനത്ത് തുടരാൻ അർഹതയില്ലെന്നും അദ്ദേഹം വ്യക്തമാക്കി.
വോട്ടർപട്ടികയിലെ തിരിമറികൾക്കെതിരെ സമാന ചിന്താഗതിയുള്ള പ്രതിപക്ഷ പാർട്ടികളെ (INDIA മുന്നണി) അണിനിരത്തി പാർലമെന്റിലും തെരുവിലും ശക്തമായ പ്രക്ഷോഭം സംഘടിപ്പിക്കാനാണ് കോൺഗ്രസിന്റെ തീരുമാനം.
