മോസ്കോ: റഷ്യൻ വ്യോമസേനയുടെ ആണവായുധശേഷിയുള്ള തന്ത്രപ്രധാന ബോംബർ വിമാനമായ ‘ടിയു-95’ (Tu-95) പരിശീലനപ്പറക്കലിനിടെ തകർന്നു വീണു. വിമാനത്തിലുണ്ടായിരുന്ന 6 സൈനികർ അപകടത്തിൽ കൊല്ലപ്പെട്ടു. റഷ്യയുടെ കിഴക്കൻ മേഖലയിലുള്ള അമൂർ പ്രദേശത്താണ് ദുരന്തമുണ്ടായത്.
പരിശീലന ദൗത്യത്തിന്റെ ഭാഗമായി പറന്നുയരുന്നതിനിടെ എഞ്ചിൻ തകരാർ മൂലമാണ് വിമാനം തകർന്നുവീണതെന്ന് റഷ്യൻ പ്രതിരോധ മന്ത്രാലയം അറിയിച്ചു. അപകടസമയത്ത് വിമാനത്തിൽ ആയുധങ്ങളോ സ്ഫോടകവസ്തുക്കളോ ഉണ്ടായിരുന്നില്ല. അപകടത്തിൽപ്പെട്ട ഒരാൾ രക്ഷപ്പെട്ടു. ഗുരുതരമായി പരിക്കേറ്റ ഈ സൈനികനെ അടുത്തുള്ള ആശുപത്രിയിൽ പ്രവേശിപ്പിച്ചു.
ശീതയുദ്ധ കാലം മുതൽ റഷ്യൻ വ്യോമസേനയുടെ പ്രധാന ശക്തികേന്ദ്രമായ നാല് ടർബോപ്രോപ്പ് എൻജിനുകളുള്ള തന്ത്രപ്രധാന വിമാനമാണ് ടിയു-95. യുക്രെയ്നെതിരെയുള്ള അധിനിവേശത്തിലും പോരാട്ടത്തിലും ക്രൂയിസ് മിസൈലുകൾ തൊടുക്കുന്നതിനായി റഷ്യ ഈ വിമാനങ്ങൾ വ്യാപകമായി ഉപയോഗിച്ചിരുന്നു. 2025 ജൂണിൽ യുക്രെയ്ൻ നടത്തിയ ‘സ്പൈഡർവെബ്’ ഓപ്പറേഷനിൽ ഡ്രോണുകൾ ഉപയോഗിച്ച് നിരവധി ടിയു-95 വിമാനങ്ങൾ തകർത്തിരുന്നു. യുദ്ധം രൂക്ഷമായി തുടരുന്നതിനിടെ സ്വന്തം അതിർത്തിക്കുള്ളിൽ നടന്ന ഈ അപകടം റഷ്യക്ക് വൻ തിരിച്ചടിയായിട്ടുണ്ട്. സാങ്കേതിക തകരാറിനെക്കുറിച്ച് വിദഗ്ധ സംഘം അന്വേഷണം ആരംഭിച്ചു.
