ഇന്ത്യൻ വനിതാ ക്രിക്കറ്റ് ടീമിന്റെ എക്കാലത്തെയും മികച്ച ക്യാപ്റ്റന്മാരിൽ ഒരാളായ ഹർമൻപ്രീത് കൗർ ക്യാപ്റ്റൻ സ്ഥാനം ഒഴിഞ്ഞു. ട്വന്റി-20, ഏകദിനം, ടെസ്റ്റ് ഉൾപ്പെടെയുള്ള എല്ലാ ഫോർമാറ്റുകളിലെയും ക്യാപ്റ്റൻ പദവിയാണ് താരം ഒഴിഞ്ഞത്. ഇൻസ്റ്റാഗ്രാമിലൂടെയാണ് ഹർമൻപ്രീത് തൻ്റെ തീരുമാനം ഔദ്യോഗികമായി പ്രഖ്യാപിച്ചത്.
2026-ലെ ഏഷ്യൻ ഗെയിംസിൽ ഇന്ത്യൻ ടീമിനെ സ്വർണ്ണ മെഡൽ നേട്ടത്തിലേക്ക് നയിച്ചതിന് തൊട്ടുപിന്നാലെയാണ് ഈ നിർണ്ണായക പ്രഖ്യാപനം. ക്യാപ്റ്റൻ സ്ഥാനം ഒഴിയുന്നുണ്ടെങ്കിലും താരം ടീമിൽ കളിക്കാരനായി തുടരുമെന്ന് വ്യക്തമാക്കിയിട്ടുണ്ട്. വർഷങ്ങളുടെ ഓർമ്മകളും വികാരങ്ങളും നിറഞ്ഞതാണ് തൻ്റെ നായകത്വ കാലയളവെന്ന് ഹർമൻപ്രീത് കുറിച്ചു. ടീമിനും ഇന്ത്യൻ ക്രിക്കറ്റിനുമായി തൻ്റെ സർവ്വസ്വവും നൽകിയിട്ടുണ്ടെന്നും, സ്വന്തം ആഗ്രഹങ്ങൾ മാറ്റിവെച്ച് ടീമിനാണ് എപ്പോഴും മുൻഗണന നൽകിയതെന്നും താരം വികാരാധീനയായി വ്യക്തമാക്കി.
നിരവധി പ്രതിസന്ധികളെയും വിമർശനങ്ങളെയും അതിജീവിച്ച് രാജ്യത്തെ വിജയങ്ങളിലേക്ക് നയിക്കാൻ സാധിച്ചതിൽ അഭിമാനമുണ്ടെന്ന് താരം കൂട്ടിച്ചേർത്തു. നിലവിൽ ടീം ഏറ്റവും ശക്തമായ നിലയിലാണെന്നും, പുതിയ യുവതാരങ്ങൾക്ക് നേതൃത്വത്തിലേക്ക് വളരാൻ ഏറ്റവും അനുയോജ്യമായ സമയമാണിതെന്നും പറഞ്ഞ ഹർമൻപ്രീത്, ബി.സി.സി.ഐക്കും സഹതാരങ്ങൾക്കും പരിശീലകർക്കും ആരാധകർക്കും നന്ദി രേഖപ്പെടുത്തി. ഇനിയുള്ള കാലം കളിയോടുള്ള സ്നേഹത്തിനായി മാത്രം ഇന്ത്യക്കായി തുടരുമെന്ന് പറഞ്ഞാണ് കുറിപ്പ് അവസാനിപ്പിച്ചത്.
