കാഞ്ഞിരപ്പള്ളി: മാധ്യമപ്രവർത്തകനെ കൊലപ്പെടുത്താൻ ശ്രമിച്ച കേസിൽ കുറ്റക്കാരായ പ്രതികളെ ഉടൻ അറസ്റ്റ് ചെയ്യണമെന്നാവശ്യപ്പെട്ട് ജേർണ്ണലിസ്റ്റ് & മീഡിയ അസോസിയേഷൻ പ്രക്ഷോഭത്തിലേക്ക്. സംഘടനയുടെ കോട്ടയം ജില്ലാ കമ്മിറ്റിയുടെ നേതൃത്വത്തിൽ ഒക്ടോബർ 3 ശനിയാഴ്ച ഉച്ചയ്ക്ക് 12 മണിക്ക് കാഞ്ഞിരപ്പള്ളി പോലീസ് സ്റ്റേഷനിലേക്ക് ബഹുജന പ്രതിഷേധ മാർച്ച് സംഘടിപ്പിക്കും.
മാധ്യമപ്രവർത്തകർക്ക് നേരെയുള്ള ആക്രമണങ്ങളിൽ പോലീസ് കാണിക്കുന്ന നിഷ്ക്രിയത്വത്തിൽ ശക്തമായ പ്രതിഷേധമുയർത്തിയാണ് സമരം പ്രഖ്യാപിച്ചിരിക്കുന്നത്. മാർച്ചിൽ സംഘടനയുടെ സംസ്ഥാന-ജില്ലാ ഭാരവാഹികളും ജനപ്രതിനിധികളും മേഖലയിലെ നിരവധി മാധ്യമപ്രവർത്തകരും പങ്കെടുക്കുമെന്ന് ഭാരവാഹികൾ അറിയിച്ചു.
പ്രതികളെ ഉടൻ നിയമത്തിന് മുന്നിൽ കൊണ്ടുവന്നില്ലെങ്കിൽ സമരം മറ്റ് ജില്ലകളിലേക്കും വ്യാപിപ്പിക്കാനാണ് ജേർണ്ണലിസ്റ്റ് & മീഡിയ അസോസിയേഷന്റെ തീരുമാനം.
