പാലക്കാട്: ഭീകരവാദ സംഘടനകളിലേക്കുള്ള യുവാക്കളുടെ റിക്രൂട്ട്മെന്റുമായി ബന്ധപ്പെട്ട കേസിൽ അസം സ്വദേശിയെ എൻ.ഐ.എ (National Investigation Agency) പട്ടാമ്പിയിൽ നിന്ന് കസ്റ്റഡിയിലെടുത്തു. പട്ടാമ്പി വിളയൂർ എടപ്പലത്തെ വാടകവീട്ടിൽ കുടുംബത്തോടൊപ്പം താമസിച്ച് കോഴിഫാമിൽ ജോലി ചെയ്തുവരികയായിരുന്നയാളെയാണ് പുലർച്ചെ നടത്തിയ മിന്നൽ പരിശോധനയിൽ എൻ.ഐ.എ കസ്റ്റഡിയിലെടുത്തത്.
അതിർത്തി കടന്നുള്ള ഭീകരപ്രവർത്തനങ്ങളും റിക്രൂട്ട്മെന്റുകളും സംബന്ധിച്ച അന്വേഷണത്തിന്റെ ഭാഗമായി കേരളം, അസം, പശ്ചിമ ബംഗാൾ തുടങ്ങിയ സംസ്ഥാനങ്ങളിലെ 16 കേന്ദ്രങ്ങളിലാണ് എൻ.ഐ.എ ഒരേസമയം പരിശോധന നടത്തിയത്. ഇതിന്റെ ഭാഗമായാണ് പട്ടാമ്പി വിളയൂരിലും അന്വേഷണ സംഘം എത്തിയത്.
നിരോധിത ഭീകരസംഘടനയായ ജമാഅത്ത്-ഉൽ-മുജാഹിദീൻ ബംഗ്ലാദേശിന്റെ (JMB) ഉപവിഭാഗമെന്ന് സംശയിക്കുന്ന ‘ഇമാം മഹ്മൂദർ കഫില’ എന്ന സംഘടനയുമായി ബന്ധപ്പെട്ട കേസിൻമേലാണ് അന്വേഷണം പുരോഗമിക്കുന്നത്. സാധാരണ തൊഴിലാളിയെന്ന വ്യാജേനയാണ് കസ്റ്റഡിയിലായ അസം സ്വദേശി കേരളത്തിൽ താമസിച്ചിരുന്നത്.
