പാലാ: ‘സ്വച്ഛതാ ഹി സേവാ’ (ശുചിത്വം തന്നെ സേവനം) ക്യാമ്പയിന്റെ ഭാഗമായി വിദ്യാർത്ഥികളിലും പൊതുജനങ്ങളിലും ശുചിത്വ അവബോധം സൃഷ്ടിക്കുന്നതിനായി പാലാ നഗരസഭയുടെ നേതൃത്വത്തിൽ ‘സ്പോർട്സ് ഫോർ സ്വച്ഛത’ (Sports for Swachhata) സംഘടിപ്പിക്കുന്നു. സെപ്റ്റംബർ 17 മുതൽ ഒക്ടോബർ 2 വരെ നീളുന്ന ശുചിത്വ ക്യാമ്പയിന്റെ ഭാഗമായാണ് വേറിട്ട ഈ പരിപാടി.
സെപ്റ്റംബർ 30 ബുധനാഴ്ച രാവിലെ 9.30-ന് കുരിശുപള്ളി കവലയിൽ നിന്ന് ചാവറ പബ്ലിക് സ്കൂളിലെ റോളർ സ്കേറ്റിംഗ് വിദ്യാർത്ഥികളുടെ പ്രത്യേക പ്രകടനത്തോടെ ശുചിത്വ ബോധവൽക്കരണത്തിന് തുടക്കമാകും.
തുടർന്ന് നഗരസഭാ കൗൺസിലർമാർ, മുനിസിപ്പൽ ജീവനക്കാർ, ഹരിതകർമ്മ സേന (HKS) അംഗങ്ങൾ, ശുചീകരണ വിഭാഗം ജീവനക്കാർ എന്നിവർ അണിനിരക്കുന്ന ബഹുജന റാലി കുരിശുപള്ളി കവലയിൽ നിന്ന് ആരംഭിച്ച് മുനിസിപ്പൽ ഓഫീസിലേക്ക് കടന്നുപോകും. നാടിന്റെ ശുചിത്വ പരിപാലനത്തിൽ പൊതുജന പങ്കാളിത്തം ഉറപ്പാക്കാൻ എല്ലാവരും റാലിയിൽ അണിനിരക്കണമെന്ന് നഗരസഭാ അധികൃതർ അഭ്യർത്ഥിച്ചു.
