തിരുവനന്തപുരം: സംസ്ഥാനത്ത് ഇന്ന് രാത്രി ഭാഗികമായി വൈദ്യുതി നിയന്ത്രണം ഏർപ്പെടുത്തിയേക്കുമെന്ന് കെ.എസ്.ഇ.ബി. അറിയിച്ചു. വൈകുന്നേരം 6 മണിക്കും അർദ്ധരാത്രി 12 മണിക്കും ഇടയിലായിരിക്കും നിയന്ത്രണം ഏർപ്പെടുത്താൻ സാധ്യത.
അന്തരീക്ഷ താപനില ഉയർന്നതിനെ തുടർന്ന് സംസ്ഥാനത്ത് വൈദ്യുതി ഉപഭോഗം വൻതോതിൽ വർദ്ധിച്ചതും, കേന്ദ്ര നിലയങ്ങളിൽ നിന്നും പവർ എക്സ്ചേഞ്ചിൽ നിന്നുമുള്ള വൈദ്യുതി ലഭ്യത കുറഞ്ഞതുമാണ് നിലവിലെ പ്രതിസന്ധിക്ക് കാരണം. രാജ്യത്താകമാനം ആവശ്യകത ഉയർന്ന സാഹചര്യത്തിൽ പവർ എക്സ്ചേഞ്ചിൽ 12,000 മെഗാവാട്ടിന്റെ ലഭ്യതക്കുറവ് നേരിടുന്നുണ്ട്.
പവർ എക്സ്ചേഞ്ച് വഴി ആവശ്യത്തിന് വൈദ്യുതി ലഭ്യമാകാതിരിക്കുകയോ ഗ്രിഡ് ഫ്രീക്വൻസി കുറയുകയോ ചെയ്താൽ പ്രതിസന്ധി പരിഹരിക്കാൻ ഭാഗികമായി ലോഡ് ഷെഡ്ഡിംഗ് നടത്തേണ്ടി വരുമെന്ന് കെ.എസ്.ഇ.ബി. വ്യക്തമാക്കി.
