അരുവിത്തുറ: നവീകരിച്ച പ്രശസ്തമായ അരുവിത്തുറ സെന്റ് ജോർജ് ഫൊറോന തീർത്ഥാടന ദേവാലയത്തിന്റെ ആശീർവാദ കർമ്മം പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട് നിർവ്വഹിച്ചു. ചരിത്രത്തിൽ അപൂർവ്വമായി മാത്രം സംഭവിക്കുന്നതാണ് ഇത്തരം ദേവാലയ നവീകരണങ്ങളെന്നും നവീകരിക്കപ്പെട്ട അരുവിത്തുറ പള്ളി ദൈവ സൗന്ദര്യത്തിന്റെ പ്രതീകമാണെന്നും അദ്ദേഹം പറഞ്ഞു.
പ്രൗഢമായ മാർത്തോമ്മാ നസ്രാണി പാരമ്പര്യം പേറുന്ന ക്രൈസ്തവ സമൂഹമാണ് അരുവിത്തുറയിലേത്. ഇവിടുത്തെ സവിശേഷമായ മ്യൂറൽ പെയിന്റിംഗുകളും ചരിത്രപ്രസിദ്ധമായ ആനവാതിലും ദൈവശാസ്ത്ര പഠന വിഷയങ്ങളാകുമെന്നും അദ്ദേഹം കൂട്ടിച്ചേർത്തു. കൂടാതെ മലയോര മേഖലയെ കടുത്ത ആശങ്കയിലാക്കുന്ന ഇ.എസ്.എ (ESA) പരിസ്ഥിതിലോല വിഷയത്തിൽ കർഷകർക്കും മലയോര ജനതയ്ക്കുമൊപ്പം നിലകൊള്ളാൻ സമൂഹം തയ്യാറാകണമെന്നും ബിഷപ്പ് ആഹ്വാനം ചെയ്തു.
വൈകിട്ട് 4.30-ന് ദേവാലയാങ്കണത്തിലെത്തിയ ബിഷപ്പിനെ പരമ്പരാഗത രീതിയിൽ ഏലയ്ക്കാമാല അണിയിച്ചും വാദ്യമേളങ്ങളുടെ അകമ്പടിയോടെയുമാണ് ഇടവകജനം സ്വീകരിച്ചത്. വെഞ്ചരിപ്പ് കർമ്മത്തിന് ശേഷം മോൺ. ജോസഫ് തടത്തിലിന്റെ മുഖ്യകാർമ്മികത്വത്തിൽ ആഘോഷമായ ദിവ്യബലി നടന്നു. ഫൊറോന വികാരി വെരി റവ. ഫാ. മാത്യു ചന്ദ്രൻകുന്നേൽ സ്വാഗതം ആശംസിച്ചു.
അസിസ്റ്റന്റ് വികാരിമാർ, ജനപ്രതിനിധികൾ, കൈക്കാരന്മാരായ ജോർജ് വടക്കേൽ, ആൻഡ്രൂസ് തെക്കേക്കണ്ടത്തിൽ, ജോർജ്കുട്ടി മുകാലിൽ, അഡ്വ. ടോം വെള്ളുക്കുന്നേൽ എന്നിവർ ചടങ്ങുകൾക്ക് നേതൃത്വം നൽകി.
