കിടങ്ങൂർ: ലോക പരിസ്ഥിതി ദിനത്തോടനുബന്ധിച്ച് കിടങ്ങൂർ മംഗളാരം ഇൻഫന്റ് ജീസസ് പബ്ലിക് സ്കൂളിൽ വിപുലമായ പരിപാടികൾ സംഘടിപ്പിച്ചു. വാർഡ് മെമ്പർ ശ്രീ. ജയൻ C.P. സ്കൂൾ അങ്കണത്തിൽ വൃക്ഷത്തൈ നട്ടുകൊണ്ട് ദിനാചരണ പരിപാടികൾ ഉദ്ഘാടനം ചെയ്തു.
സ്കൂൾ അസംബ്ലിയിൽ നടന്ന ചടങ്ങിൽ സ്കൂൾ മാനേജർ ഫാദർ ജോസഫ് മുണ്ടയ്ക്കൽ അധ്യക്ഷത വഹിച്ചു. പരിസ്ഥിതി സംരക്ഷണം, ആഗോളതാപനം തുടങ്ങിയ ഗുരുതരമായ വിഷയങ്ങളെക്കുറിച്ച് സംസാരിച്ച അദ്ദേഹം, പ്രകൃതിയെ നിലനിർത്തുന്നതിൽ കുട്ടികൾക്കുള്ള പങ്കിനെക്കുറിച്ച് വിദ്യാർത്ഥികൾക്ക് ബോധവൽക്കരണം നൽകി. സ്കൂൾ പ്രിൻസിപ്പൽ റവ. സിസ്റ്റർ സോഫിയ ചടങ്ങിൽ പരിസ്ഥിതി ദിന സന്ദേശം കൈമാറി.
സ്കൂളിലെ അധ്യാപികമാരായ ആശാ ഗോപാലകൃഷ്ണൻ, വീണ P തങ്കപ്പൻ, Lisamma Mathew എന്നിവർ പരിസ്ഥിതി ദിന പരിപാടികൾക്ക് നേതൃത്വം നൽകി. പരിസ്ഥിതി സംരക്ഷണത്തിന്റെ പ്രാധാന്യം വിളിച്ചോതുന്ന വിവിധ പരിപാടികളിൽ അധ്യാപകരും വിദ്യാർത്ഥികളും സജീവമായി പങ്കെടുത്തു.
