തിരുവനന്തപുരം: സംസ്ഥാനത്ത് പനി കേസുകളും ഇൻഫ്ലുവൻസ ബാധയും അതിവേഗം പടരുന്നതായി ആരോഗ്യവകുപ്പിന്റെ കണക്കുകൾ. ഈ മാസം ഇതുവരെ 20 ഇൻഫ്ലുവൻസ മരണങ്ങളാണ് സംസ്ഥാനത്ത് ഔദ്യോഗികമായി റിപ്പോർട്ട് ചെയ്തത്. കഴിഞ്ഞ വർഷം സെപ്റ്റംബർ മാസത്തിൽ വെറും നാല് മരണങ്ങളും 724 രോഗബാധയുമായിരുന്നു രേഖപ്പെടുത്തിയിരുന്നത്. എന്നാൽ ഈ മാസം മാത്രം ഇൻഫ്ലുവൻസ ബാധിതരുടെ എണ്ണം 251 ആയി ഉയർന്നു.
ഈ വർഷം ഇതുവരെ മാത്രം 11,021 പേർക്ക് ഇൻഫ്ലുവൻസ ബാധ സ്ഥിരീകരിക്കുകയും 119 പേർ മരണപ്പെടുകയും ചെയ്തിട്ടുണ്ട്. കഴിഞ്ഞ വർഷം ആകെയുണ്ടായ ഇൻഫ്ലുവൻസ കേസുകൾ 6,182 ആയിരുന്നു; മരണസംഖ്യ 40 ഉം. കഴിഞ്ഞ വർഷത്തെ ആകെ കണക്കുകളുമായി താരതമ്യം ചെയ്യുമ്പോൾ ഈ വർഷത്തെ ഇൻഫ്ലുവൻസ മരണങ്ങൾ ഇരട്ടിയിലധികമായി ഉയർന്നത് വലിയ ആശങ്കയ്ക്ക് വഴിവെച്ചിട്ടുണ്ട്.
കാലാവസ്ഥാ വ്യതിയാനവും വൈറസ് വകഭേദങ്ങളുടെ വ്യാപനവുമാണ് പനി കേസുകൾ ഉയരാൻ കാരണമെന്നാണ് പ്രാഥമിക നിഗമനം. പ്രതിരോധ പ്രവർത്തനങ്ങൾ ഊർജ്ജിതമാക്കാനും പനി ലക്ഷണങ്ങളുള്ളവർ സ്വയം ചികിത്സ ഒഴിവാക്കി എത്രയും വേഗം വൈദ്യസഹായം തേടാനും ആരോഗ്യവകുപ്പ് നിർദ്ദേശം നൽകി.
