തിരുവനന്തപുരം: സ്വാതന്ത്ര്യദിനാഘോഷങ്ങളിൽ വന്ദേമാതരം മുഴുവൻ ആലപിക്കുന്നതിനായി ചീഫ് സെക്രട്ടറിക്ക് നിർദേശം നൽകിയിട്ടില്ലെന്ന ലോക്ഭവന്റെ (രാജ്ഭവൻ) വിശദീകരണത്തിനെതിരെ തിരുത്തുമായി വിദ്യാഭ്യാസമന്ത്രി എൻ. ഷംസുദ്ദീൻ. രാജ്ഭവന്റെ നിലപാട് എല്ലാവർക്കും അറിയാവുന്നതാണെന്നും, വിഷയത്തിൽ സർക്കാർ നിലപാട് മുഖ്യമന്ത്രി വ്യക്തമാക്കിക്കഴിഞ്ഞതാണെന്നും മന്ത്രി പറഞ്ഞു.
കേന്ദ്രവും സംസ്ഥാനവും തമ്മിലുള്ള ഭരണഘടനാപരമായ ബന്ധത്തിന്റെ ഭാഗമായി രാജ്ഭവനിൽ നിന്ന് വരുന്ന സർക്കുലറുകൾ ഫോർവേഡ് ചെയ്യുമ്പോൾ അതിലെ രാഷ്ട്രീയവും പോരായ്മകളും മനസ്സിലാക്കി പിന്നീട് തിരുത്തുകയാണ് ചെയ്തതെന്ന് അദ്ദേഹം വ്യക്തമാക്കി. വിഷയത്തിൽ മുഖ്യമന്ത്രി കൃത്യമായ വിശദീകരണം നൽകിയിട്ടുണ്ടെന്നും, അതിനുശേഷം ഓരോ മന്ത്രിമാരും പ്രത്യേകം പ്രതികരണം നടത്തേണ്ട ആവശ്യമുണ്ടെന്ന് കരുതുന്നില്ലെന്നും മന്ത്രി ഷംസുദ്ദീൻ കൂട്ടിച്ചേർത്തു.
