ഫ്രാൻസിൽ വിദ്യാർത്ഥി പ്രക്ഷോഭം അക്രമാസക്തമാകുന്നു; സ്കൂളുകൾക്ക് മുന്നിൽ തീവെപ്പും ഉപരോധവും, ഒറ്റദിവസം കൊണ്ട് 1,949 പേർ അറസ്റ്റിൽ പാരീസ്: ക്ലാസ് മുറികളിലെ സൗകര്യക്കുറവിനും അധ്യാപക ക്ഷാമത്തിനുമെതിരെ ഫ്രാൻസിൽ ആരംഭിച്ച വിദ്യാർത്ഥി പ്രക്ഷോഭം രാജ്യവ്യാപകമായി അക്രമാസക്തമാകുന്നു.
തലസ്ഥാനമായ പാരീസ് ഉൾപ്പെടെ വിവിധ നഗരങ്ങളിൽ സ്കൂളുകൾക്ക് മുന്നിൽ മാലിന്യങ്ങൾക്ക് തീയിട്ടും റോഡുകളും പ്രവേശന കവാടങ്ങളും ഉപരോധിച്ചും വിദ്യാർത്ഥികൾ തെരുവിലിറങ്ങി. കഴിഞ്ഞ വ്യാഴാഴ്ച മാത്രം പ്രതിഷേധവുമായി ബന്ധപ്പെട്ട് 1,949 പേരെ അറസ്റ്റ് ചെയ്തതായി ഫ്രഞ്ച് ആഭ്യന്തര മന്ത്രാലയം ഔദ്യോഗികമായി അറിയിച്ചു.
രാജ്യത്തുടനീളമുള്ള ആയിരത്തിലധികം സെക്കൻഡറി സ്കൂളുകളുടെ (Lycées) പ്രവർത്തനത്തെ പ്രക്ഷോഭം പ്രതികൂലമായി ബാധിച്ചിട്ടുണ്ട്. പ്രകടനങ്ങൾ പലയിടത്തും പൊലീസുമായുള്ള ഏറ്റുമുട്ടലിലേക്ക് വഴിമാറിയതോടെ സ്ഥിതിഗതികൾ കൂടുതൽ സങ്കീർണ്ണമായി. അക്രമസംഭവങ്ങളിൽ 300-ഓളം സുരക്ഷാ ഉദ്യോഗസ്ഥർക്കും നിരവധി അധ്യാപകർക്കും പരുക്കേറ്റിട്ടുണ്ട്. പോലീസിന് നേരെ കല്ലേറും പടക്കങ്ങളും എറിഞ്ഞതിനെ തുടർന്ന് പ്രതിഷേധക്കാരെ പിരിച്ചുവിടാൻ പോലീസ് കണ്ണീർവാതകവും ലാത്തിച്ചാർജും പ്രയോഗിച്ചു.
വിദ്യാഭ്യാസ മേഖലയിലെ അടിസ്ഥാന സൗകര്യങ്ങൾ വർദ്ധിപ്പിക്കുക, ക്ലാസുകളിലെ തിരക്ക് കുറയ്ക്കുക, ഒഴിവുള്ള അധ്യാപക തസ്തികകൾ അടിയന്തരമായി നികത്തുക എന്നീ ആവശ്യങ്ങൾ ഉന്നയിച്ചാണ് പ്രതിഷേധം ആരംഭിച്ചത്. എന്നാൽ പ്രക്ഷോഭം നഗരങ്ങളിൽ ക്രമസമാധാന പ്രശ്നമായി മാറിയതോടെ പ്രധാനമന്ത്രി സെബാസ്റ്റ്യൻ ലെകോർണു അടിയന്തര പ്രതിസന്ധി പരിഹാര യോഗം വിളിച്ചു ചേർത്തിട്ടുണ്ട്. വരും ദിവസങ്ങളിലും സമരം കൂടുതൽ ശക്തമാകുമെന്നാണ് സൂചന.
