ന്യൂയോർക്ക്: ബഹിരാകാശ ഗവേഷണ ചരിത്രത്തിൽ പുതിയൊരു നാഴികക്കല്ല് പിന്നിട്ട് അമേരിക്കൻ ബഹിരാകാശ ഏജൻസിയായ നാസയുടെ റോബോട്ടിക് പേടകം ‘വോയേജർ 1’. 49 വർഷവും രണ്ട് മാസവും 11 ദിവസവും സഞ്ചരിച്ചാണ് പേടകം ഭൂമിയിൽ നിന്ന് ഒരു പ്രകാശദിനം (One Light-Day) എന്ന ചരിത്രദൂരത്തിലേക്ക് എത്തിയത്.
മണിക്കൂറിൽ 61,000 കിലോമീറ്റർ വേഗതയിൽ സൗരയൂഥത്തിന് പുറത്തേക്ക് കുതിക്കുന്ന വോയേജർ 1, ബുധനാഴ്ച ഇന്ത്യൻ സമയം വൈകീട്ട് 3.46-നാണ് ഈ നേട്ടം കൈവരിച്ചത്. അതായത്, പേടകത്തിൽ നിന്ന് പുറപ്പെടുന്ന ഒരു പ്രകാശരശ്മിയോ റേഡിയോ സിഗ്നലോ ഭൂമിയിലെത്താൻ ഇനി കൃത്യം 24 മണിക്കൂർ (ഒരു ദിവസം) എടുക്കും. ഭൂമിയിൽ നിന്ന് ഏറ്റവും അകലെയുള്ള മനുഷ്യനിർമ്മിത വസ്തുവെന്ന ബഹുമതിയും വോയേജർ 1-ന് സ്വന്തമാണ്.
1977 സെപ്റ്റംബർ 5-ന് ഫ്ലോറിഡയിലെ കേപ് കനാവറൽ എയർഫോഴ്സ് സ്റ്റേഷനിൽ നിന്നാണ് വോയേജർ 1 അതിന്റെ ചരിത്രദൗത്യം ആരംഭിച്ചത്. ഇത്രയും വർഷങ്ങൾക്ക് ശേഷവും പേടകം നാസയുമായി ആശയവിനിമയം നടത്തുന്നുണ്ട് എന്നതും ശ്രദ്ധേയമാണ്. ഭാവിയിൽ എപ്പോഴെങ്കിലും ഈ പേടകം കണ്ടെത്തുന്ന അന്യഗ്രഹ നാഗരികതയ്ക്ക് മനുഷ്യരാശിയെ പരിചയപ്പെടുത്താനായി 12 ഇഞ്ച് സ്വർണ്ണം പൂശിയ ചെമ്പ് ഡിസ്കായ ‘ഗോൾഡൻ റെക്കോർഡും’ ഇതിൽ സൂക്ഷിച്ചിട്ടുണ്ട്. 115 ചിത്രങ്ങൾ, പ്രകൃതിദത്ത ശബ്ദങ്ങൾ, വിവിധ സംഗീത ശേഖരങ്ങൾ, 55 ഭാഷകളിലെ ആശംസകൾ എന്നിവയാണ് ഇതിൽ രേഖപ്പെടുത്തിയിരിക്കുന്നത്.
















