മൂന്നാർ: സഞ്ചാരികളുടെ മനംകവർന്ന് മൂന്നാറിൽ വീണ്ടും നീലക്കുറിഞ്ഞി വസന്തം. സമുദ്രനിരപ്പിൽ നിന്ന് 6,000 അടി ഉയരത്തിൽ സ്ഥിതി ചെയ്യുന്ന മാട്ടുപ്പെട്ടി, കൊരണ്ടക്കാട് മലനിരകളിലാണ് നീലക്കുറിഞ്ഞികൾ വ്യാപകമായി പൂത്തുലഞ്ഞത്.
12 വർഷത്തിന് ശേഷമാണ് ഈ പ്രദേശങ്ങളിൽ നീലക്കുറിഞ്ഞി വീണ്ടും പൂവിടുന്നത്. പച്ചപ്പുനിറഞ്ഞ മലനിരകളിൽ നീല വസന്തം തീർത്ത കാഴ്ച കാണാൻ നിരവധിയാളുകളാണ് മൂന്നാറിലേക്ക് എത്തുന്നത്. ഓഗസ്റ്റ്, സെപ്റ്റംബർ മാസങ്ങളിൽ വസന്തം പൂർണ്ണ ഘട്ടത്തിലെത്തുമെന്നാണ് പ്രതീക്ഷിക്കുന്നത്.
നീലക്കുറിഞ്ഞി പൂത്ത വിവരമറിഞ്ഞ് വരും ദിവസങ്ങളിൽ കൂടുതൽ ആഭ്യന്തര-വിദേശ സഞ്ചാരികൾ മൂന്നാറിലേക്ക് ഒഴുകിയെത്തുമെന്ന പ്രതീക്ഷയിലാണ് പ്രാദേശിക ടൂറിസം മേഖല.
