തിരുവനന്തപുരം: ലയണൽ മെസിയെയും അർജന്റീന ഫുട്ബോൾ ടീമിനെയും കേരളത്തിൽ എത്തിക്കാമെന്ന് പറഞ്ഞ് തട്ടിപ്പ് നടത്തിയെന്ന കേസിൽ മുൻ കായിക മന്ത്രി വി. അബ്ദുറഹിമാനെ പ്രത്യേക അന്വേഷണ സംഘം (SIT) ചോദ്യം ചെയ്തു. കായിക വകുപ്പിലെ മുതിർന്ന ഉദ്യോഗസ്ഥരെ അറിയിക്കാതെ സ്വകാര്യ ചാനൽ കമ്പനിക്ക് വഴിവിട്ട സഹായം നൽകിയെന്ന ഗുരുതരമായ ആരോപണത്തിന്റെ അടിസ്ഥാനത്തിലാണ് ചോദ്യം ചെയ്യൽ നടപടി.
അർജന്റീന ടീമിന്റെ സന്ദർശനത്തിന്റെ പേരിൽ കോടിക്കണക്കിന് രൂപയുടെ സാമ്പത്തിക ഇടപാടുകളും സ്പോൺസർഷിപ്പ് തട്ടിപ്പുകളും നടന്നിട്ടുണ്ടെന്നാണ് കേസിലെ പ്രധാന കണ്ടെത്തൽ. ചാനൽ കമ്പനിയുമായി മന്ത്രിയും അദ്ദേഹത്തിന്റെ ഓഫീസും നടത്തിയ കരാറുകളിലും സാമ്പത്തിക കാര്യങ്ങളിലും ഉയർന്ന ക്രമക്കേടുകളാണ് അന്വേഷണ സംഘം പരിശോധിച്ച് വരുന്നത്.
സംഭവത്തിൽ സ്പോർട്സ് കൗൺസിൽ ഭാരവാഹികളുടെയും കായിക വകുപ്പ് ഉദ്യോഗസ്ഥരുടെയും മൊഴികൾ അന്വേഷണ സംഘം നേരത്തെ രേഖപ്പെടുത്തിയിരുന്നു. ചോദ്യം ചെയ്യലിൽ നിന്ന് ലഭിച്ച വിവരങ്ങളുടെ അടിസ്ഥാനത്തിൽ കേസിൽ കൂടുതൽ തുടർനടപടികളിലേക്ക് കടക്കാനാണ് പ്രത്യേക അന്വേഷണ സംഘത്തിന്റെ തീരുമാനം.
