തിരുവനന്തപുരം: കേരളത്തിന്റെ വികസന കുതിപ്പിന് വേഗത കൂട്ടിക്കൊണ്ട് വിഴിഞ്ഞം അന്താരാഷ്ട്ര തുറമുഖത്തിൽ നിന്നുള്ള എക്സ്പോർട്ട്-ഇമ്പോർട്ട് (EXIM) കരമാർഗ്ഗ ചരക്ക് ഗതാഗതത്തിന് (ഗേറ്റ് വേ) ഇന്ന് തുടക്കമാകുന്നു. ആദ്യ ഘട്ട ചരക്ക് കണ്ടെയ്നറുകളുടെ ഫ്ലാഗ് ഓഫ് ചടങ്ങ് രാവിലെ തുറമുഖ ഗേറ്റിൽ വച്ച് നടക്കും. കേന്ദ്ര തുറമുഖ-ഷിപ്പിങ് മന്ത്രി സർബാനന്ദ സോനോബാൾ ഉൾപ്പെടെയുള്ള പ്രമുഖർ ചടങ്ങിൽ സംബന്ധിക്കും.
തുറമുഖ അധിഷ്ഠിത വ്യവസായ വളർച്ചയും അന്താരാഷ്ട്ര തലത്തിലുള്ള ലോജിസ്റ്റിക്സ് മികവും ലക്ഷ്യമിട്ടുള്ള സംസ്ഥാന സർക്കാരിന്റെ ‘മിഷൻ സമുദ്ര’ (Mission Samudra) പദ്ധതിയുടെ ഔദ്യോഗിക പ്രഖ്യാപനവും ഇന്ന് നടക്കും. കരമാർഗ്ഗമുള്ള ചരക്ക് നീക്കം സാധ്യമാകുന്നതോടെ ദക്ഷിണേന്ത്യൻ സംസ്ഥാനങ്ങളുടെ പ്രധാന വ്യാപാര ഗേറ്റ് വേ ആയി വിഴിഞ്ഞം മാറും. സംസ്ഥാനത്തെ ചെറുകിട-ഇടത്തരം ഉത്പാദകർക്ക് കുറഞ്ഞ ചെലവിലും സമയലാഭത്തിലും ഉത്പന്നങ്ങൾ ലോകവിപണിയിലെത്തിക്കാൻ ഇതിലൂടെ സാധിക്കും
