ചരിത്രപ്രസിദ്ധമായ കടപ്ലാമറ്റം കാഴ്ചവയ്പു തിരുനാൾ ഭക്തിനിർഭരമായി ആഘോഷിച്ചു
ഏഷ്യയിലെ തന്നെ സവിശേഷമായ ആചാരങ്ങളാൽ ശ്രദ്ധേയമായ കടപ്ലാമറ്റം സെന്റ് മേരിസ് ഫൊറോനാ പള്ളിയിലെ കാഴ്ചവയ്പു തിരുനാൾ വിശ്വാസനിറവിൽ ആഘോഷിച്ചു. പരിശുദ്ധ അമ്മ ഉണ്ണീശോയെ ശിമയോൻ ബാവായുടെ കരങ്ങളിൽ കാഴ്ചവയ്ക്കുന്നതിന്റെ ഓർമ്മ പുതുക്കുന്ന ഈ തിരുനാൾ, ഭക്തിസാന്ദ്രമായ ചടങ്ങുകളോടെയാണ് സമാപിച്ചത്.
30 ദിവസത്തെ തിരുസ്വരൂപ പ്രയാണത്തിന് ശേഷം നടന്ന മൂന്ന് ദിവസത്തെ പ്രധാന തിരുനാൾ ചടങ്ങുകളിൽ അനേകായിരങ്ങൾ പങ്കെടുത്തു. ഇന്നലെ നടന്ന തിരുനാൾ റാസയ്ക്ക് ഫാ. ജേക്കബ് കടുതോടിൽ മുഖ്യകാർമ്മികത്വം വഹിച്ചു. നിരവധി വൈദികർ സഹകാർമ്മികരായിരുന്നു.
പ്രദക്ഷിണം: റാസക്കുർബാനയെ തുടർന്ന് നടന്ന ആയിരങ്ങൾ പങ്കെടുത്ത കാഴ്ചവയ്പു പ്രദക്ഷിണം നവ്യാനുഭവമായി.
തുടർന്ന് ആകാശ വിസ്മയവും വാദ്യമേളങ്ങളുടെ മ്യൂസിക് ഫ്യൂഷനും ആഘോഷങ്ങൾക്ക് വർണ്ണപ്പൊലിമയേകി. ഫൊറോനാ വികാരി വെരി. റവ. ഫാദർ ജോസഫ് മുളഞ്ഞനാൽ, അസി. വികാരി ഫാ. ജോസഫ് തേവർപറമ്പിൽ എന്നിവർക്കൊപ്പം കൈക്കാരന്മാരായ ഷാജി സെബാസ്റ്റ്യൻ, ജോസ് മാത്യു, മാത്തുകുട്ടി തോമസ് എന്നിവർ തിരുനാളിന് നേതൃത്വം നൽകി.
