2024 ഓഗസ്റ്റ് 16 വെള്ളി 1199 കർക്കിടകം 32
വാർത്തകൾ
- ആഗോള ആരോഗ്യ അടിയന്തരാവസ്ഥ പ്രഖ്യാപിച്ചു
എം പോക്സ് പടരുന്ന സാഹചര്യത്തിൽ ആഗോള ആരോഗ്യ അടിയന്തരാവസ്ഥ പ്രഖ്യാപിച്ച് ലോകാരോഗ്യ സംഘടന. രണ്ട് വർഷത്തിനിടെ രണ്ടാം തവണയാണിത്. കോംഗോയിലും സമീപ രാജ്യങ്ങളിലും എം പോക്സ് പടരുന്ന സാഹചര്യത്തിലാണ് തീരുമാനം. ആഫ്രിക്കയിൽ 517 പേരാണ് എം പോക്സ് ബാധിച്ചത് മരിച്ചത്. 17000 പേർക്ക് രോഗബാധയെന്ന് സംശയം. 13 രാജ്യങ്ങളിലാണ് എം പോക്സ് റിപ്പോർട്ട് ചെയ്തത്.
- സ്വാതന്ത്രദിനാഘോഷം സെൻറ് ജോൺസ് എൽ.പി സ്കൂളിൽ
അമ്പാറനിരപ്പേൽ:അമ്പാറനിരപ്പേൽ സെൻറ് ജോൺസ് എൽ.പി സ്കൂളിൽ സ്വാതന്ത്ര ദിനം വിപുലമായ പരിപാടികളോടെ ആഘോഷിച്ചു. സ്കൂൾ മാനേജർ റവ .ഫാ ജോർജ് കിഴക്കേ അരഞ്ഞാണിയിൽ പതാക ഉയർത്തി. തുടർന്ന് കുട്ടികൾ അവതരിപ്പിച്ച ഫ്ളാഷ് മോബ് ഏവരുടെയും പ്രശംസ പിടിച്ചു പറ്റി. PTAപ്രസിഡൻ്റ് ശ്രീ. ബിനു ജോസഫ് ആശംസയർപ്പിച്ച് സംസാരിച്ചു.
- ‘കഴിഞ്ഞ 10 വർഷം യുവാക്കൾക്ക് പ്രതീക്ഷ നൽകിയ വർഷങ്ങൾ’
കഴിഞ്ഞ 10 വർഷം യുവാക്കൾക്ക് പ്രതീക്ഷ നൽകിയ വർഷങ്ങളായിരുന്നുവെന്ന് പ്രധാനമന്ത്രി നരേന്ദ്രമോദി. 10 വർഷം കൊണ്ട് രാജ്യം ബഹുദൂരം മുന്നേറി. ഉത്പാദന മേഖലയുടെ ഹബ്ബായി ഭാരതം മാറി, മധ്യവർഗത്തിന് ഗുണമേന്മയുള്ള ജീവിതം ഉറപ്പാക്കാൻ കഴിഞ്ഞതായും പ്രധാനമന്ത്രി ചെങ്കോട്ടയിൽ നടത്തിയ പ്രസംഗത്തിൽ പറഞ്ഞു. സേവനത്തിന് അവസരം നൽകിയ ജനത്തിന് മുന്നിൽ ശിരസ് നമിക്കുന്നതായും മോദി.
- സ്വാതന്ത്ര്യ ദിനാശംസകൾ നേർന്ന് ഗവർണർ
78-ാമത് സ്വാതന്ത്ര്യ ദിനാശംസകൾ നേർന്ന് ഗവർണർ ആരിഫ് മുഹമ്മദ് ഖാൻ. അതിവേഗം വളരുന്ന സാമ്പത്തിക ശക്തി എന്ന നിലയിൽ ഭാരതത്തിന്റെ ഒരോ ചുവടുവയ്പും ആഗോള പുരോഗതിക്ക് കരുത്തുപകരുന്നതാണ് എന്നതിൽ നമുക്ക് അഭിമാനിക്കാം. സ്വാതന്ത്യദിനം ആഘോഷത്തിന്റേത് മാത്രമല്ലെന്നും നമുക്ക് സ്വാതന്ത്യം നേടി തന്ന രാജ്യസ്നേഹികളുടെ പ്രയത്നത്തേയും ആത്മസമർപ്പണത്തേയും നന്ദിയോടെ ഓർക്കാനുള്ളത് കൂടിയാണെന്നും അദ്ദേഹം പറഞ്ഞു.
- നാരീശക്തി ഇന്ത്യയുടെ സമ്പത്ത്’
സ്വാതന്ത്ര്യ ദിനത്തോടനുബന്ധിച്ച് രാജ്യത്തെ അഭിസംബോധന ചെയ്ത് രാഷ്ട്രപതി ദ്രൗപതി മുർമു. സ്വാതന്ത്ര്യത്തിനായി ജീവൻ ബലിയർപ്പിച്ചവരോട് രാജ്യം എന്നും കടപ്പെട്ടിരിക്കും. ഏറ്റവും വലിയ ജനാധിപത്യശക്തിയായി ഇന്ത്യ മാറിയിരിക്കുന്നു. നാരീശക്തി ഇന്ത്യയുടെ സമ്പത്താണെന്നും പ്രധാനമന്ത്രിയുടെ വികസന പദ്ധതികൾ എല്ലാ വിഭാഗം ജനങ്ങളിലേക്കും എത്തുകയാണെന്നും രാഷ്ട്രപതി പറഞ്ഞു.
- ലഹരി വിരുദ്ധ പാർലമെന്റ്
പെരിങ്ങുളം: പെരിങ്ങുളം സെന്റ് അഗസ്റ്റിൻസ് ഹൈസ്കൂളിൽ, അഡാർട്ട് ക്ലബ്ബിന്റെയും റ്റീൻസ് ക്ലബ്ബിന്റെയും സംയുക്ത ആഭിമുഖ്യത്തിൽ ലഹരി വിമുക്ത പാർലമെന്റ് സംഘടിപ്പിച്ചു. ആന്റി നാർക്കോട്ടിക്ക് പ്രോഗ്രാമിന്റിന്റെ നോഡൽ ഓഫീസർ സി.ലിഡിയ എൻ. ജോയി മോഡറേറ്റർ ആയിരുന്നു. അധ്യാപക പ്രതിനിധി ശ്രീമതി ജിൻസി മോൾ ജേക്കബ് അധ്യക്ഷത വഹിച്ച് സംസാരിച്ചു. റ്റീൻസ് ക്ലബ് കോർഡിനേറ്റർ ശ്രീമതി ഷെറിൻ ജോർജ് സ്വാഗതം പറഞ്ഞ സമ്മേളനത്തിൽ കുമാരി സിയ ജോസഫ് ക്യതജഞത പ്രകാശിപ്പിച്ചു .ഹൈസ്കൂൾ കുട്ടികൾ നടത്തിയ ലഹരി വിരുദ്ധ പാർലമെന്റ് കാഴ്ചക്കാർക്ക് പുതിയൊരു അനുഭവം ആയി.
- സ്വാതന്ത്ര്യദിനം; ഗാന്ധിജിയും ഭഗത് സിംഗും സ്വ‌പ്നം കണ്ട ഇന്ത്യ
- സ്വാതന്ത്ര്യം ഒരിക്കലും വിലകൊടുത്ത് വാങ്ങുന്നതല്ല, അത് ജീവന്റെ ശ്വാസമാണ് – ഗാന്ധിജി.
- ഒരു രാജ്യത്തിന്റെ സംസ്കാരം അതിന്റെ ജനങ്ങളുടെ ഹൃദയത്തിലും ആത്മാവിലും കുടികൊള്ളുന്നു – ഗാന്ധിജി.
- ബോംബുകളും പിസ്റ്റളുകളും ഒരു വിപ്ലവം സൃഷ്ടിക്കുന്നില്ല ആശയങ്ങൾ ഉണരുന്ന കല്ലിൽ വിപ്ലവത്തിന്റെ വാൾ മൂർച്ച കൂട്ടുന്നു -ഭഗത് സിംഗ്.
- അവർ എന്നെ കൊന്നേക്കാം, പക്ഷേ അവർക്ക് എന്റെ ആശയങ്ങളെ കൊല്ലാൻ കഴിയില്ല -ഭഗത് സിംഗ്.
- കുവൈറ്റിലെ പ്രവാസികളുടെ ശ്രദ്ധയ്ക്ക്
കുവൈറ്റിൽ ഭിന്നശേഷിക്കാരായ
പൗരന്മാരെ പരിചരിക്കുന്നവർക്ക് 45 ദിവസത്തിലധികം രാജ്യം വിട്ടു നിൽക്കുന്നതിന് നിയന്ത്രണം. നിർദ്ദേശമനുസരിച്ച്, പരിചരണത്തിനായി ഭിന്നശേഷിക്കാരുടെ നിയോഗിക്കപ്പെട്ട വ്യക്തികളും ഡ്രൈവർമാരും രാജ്യത്തിന് പുറത്ത് പോവുകയാണെങ്കിൽ 45 ദിവസത്തെ കാലാവധിക്കുള്ളിൽ തിരികെയെത്തുമെന്ന സത്യവാങ്മൂലം നൽകണം.
ചികിത്സയുടെ ഭാഗമായി വിദേശത്ത് കഴിയുന്നതിന് പുതിയ തീരുമാനം ബാധകമല്ല.
- സ്വാതന്ത്ര്യ ദിനത്തിൽ ഭീകരാക്രമണ മുന്നറിയിപ്പ്, കനത്ത സുരക്ഷ
രാജ്യം 78-ാം സ്വാതന്ത്ര്യ ദിനാഘോഷത്തിന് ഒരുങ്ങിയതോടെ ഭീകരാക്രമണ സാധ്യതയെന്ന മുന്നറിയിപ്പിനെ തുടർന്ന് ദില്ലിയിലടക്കം സുരക്ഷ ശക്തമാക്കി. രാജ്യതലസ്ഥാനത്ത് 10,000 പൊലീസുകാരെ വിന്യസിച്ചു. ജമ്മു കശ്മമീരിലടക്കം ഏറ്റുമുട്ടൽ കണക്കിലെടുത്ത് കനത്ത ജാഗ്രതയിലാണ് രാജ്യം. ചെങ്കോട്ട ഉൾപ്പെടെ രാജ്യതലസ്ഥാന മേഖലയിൽ കനത്ത സുരക്ഷ വിന്യാസമാണ് ഒരുക്കിയത്. രാജ്യത്തിന്റെ അതിർത്തികളിലും സുരക്ഷ ശക്തമാക്കി.
- സ്വാതന്ത്ര്യദിനാഘോഷ നിറവിൽ കേരളം
വയനാട്ടിലെ സ്വാതന്ത്ര്യദിന ചടങ്ങ് കൽപ്പറ്റ SKMJ സ്കൂൾ ഗ്രൗണ്ടിൽ നടന്നു. മന്ത്രി ഒആർ കേളു പതാക ഉയർത്തി. ഉരുൾപൊട്ടലിന്റെ പശ്ചാത്തലത്തിൽ ആഘോഷ പരിപാടികൾ, പരേഡ് എന്നിവ ഒഴിവാക്കിയാണ് ചടങ്ങുകൾ നടന്നത്. കോഴിക്കോട് വിക്രം മൈതാനിൽ മന്ത്രി എകെ ശശീന്ദ്രൻ പതാക ഉയർത്തി. മലപ്പുറം MSP മൈതാനത്ത് മന്ത്രി കെ രാജനും കണ്ണൂർ കളക്ടറേറ്റ് മൈതാനിയിൽ രാമചന്ദ്രൻ കടന്നപ്പള്ളിയും പതാക ഉയർത്തി.
- സംസ്ഥാനം ദുഃഖത്തിൽ, അതിജീവിക്കണം; മുഖ്യമന്ത്രി
രാജ്യത്തിന്റെ 78-ാം സ്വാതന്ത്ര്യദിനം ആഘോഷിച്ച് കേരളം. തിരുവനന്തപുരം സെൻട്രൽ സ്റ്റേഡിയത്തിൽ മുഖ്യമന്ത്രി പിണറായി വിജയൻ പതാക ഉയർത്തി. കനത്ത മഴയ്ക്കിടെയാണ് തിരുവനന്തപുരത്ത് സ്വാതന്ത്ര്യദിനാഘോഷം നടന്നത്. വയനാട് ദുരന്തത്തിന്റെ പശ്ചാത്തലത്തിൽ സംസ്ഥാനം അതീവ ദുഖത്തിലാണെന്നും വിഷമിച്ചിരുന്നാൽ മതിയാകില്ലെന്നും നമുക്ക് അതിജീവിക്കേണ്ടതുണ്ടെന്നും മുഖ്യമന്ത്രി സ്വാതന്ത്ര്യദിന സന്ദേശത്തിൽ പറഞ്ഞു.
- വിദ്യാർത്ഥി രക്ഷാകർത്തൃ ബോധവൽക്കരണ ക്ലാസ്
പെരിങ്ങുളം : പെരിങ്ങുളം സെന്റ് അഗസ്റ്റിൻസ് ഹൈസ്കൂളിൽ ടീൻസ് ക്ലബ്ബ്ന്റെ നേതൃത്വത്തിൽ രക്ഷിതാക്കൾക്കും വിദ്യാർത്ഥികൾക്കുമുള്ള ബോധവൽക്കരണ ക്ലാസ്സ്‌ നടത്തപ്പെട്ടു. പിടിഎ പ്രസിഡന്റ് ശ്രീ ബിജു സി കടപ്ര അധ്യക്ഷനായ പ്രസ്തുത യോഗത്തിൽ സ്കൂൾ ഹെഡ്മാസ്റ്റർ ശ്രീ ജോസുകുട്ടി ജേക്കബ് സ്വാഗതം ആശംസിച്ചു. തുടർന്ന് രക്ഷിതാക്കൾക്കും വിദ്യാർത്ഥികൾക്കും ആയി പ്രശസ്ത എഴുത്തുകാരിയും പ്രഭാഷകയുമായ ഡോ. ആൻസി ജോസഫ് ( മുൻ പ്രിൻസിപ്പൽ, സെന്റ് ഡോമിനിക്സ് കോളേജ് കാഞ്ഞിരപ്പള്ളി ) ക്ലാസ് നയിച്ചു. ഒരു വ്യക്തിയുടെ ജീവിതത്തിലെ ഏറ്റവും പ്രധാന കാലഘട്ടമായ കൗമാരം എങ്ങനെ ആസാദ്യകരവും ആരോഗ്യകരവുമാക്കാം എന്നതിനെക്കുറിച്ചും അതിൽ മാതാപിതാക്കൾക്കും മക്കൾക്കും ഉള്ള ഉത്തരവാദിത്വത്തെക്കുറിച്ചുമായിരുന്നു ക്ലാസ് നൽകിയത്. സ്റ്റാഫ് സെക്രട്ടറി ശ്രീമതി സുസ്മി അഗസ്റ്റിൻ യോഗത്തിന് കൃതജ്ഞത അർപ്പിച്ചു.
- സ്വാതന്ത്ര്യ പുലരി വർണ്ണാഭമാക്കി സെൻറ് ആൻറണീസ് എച്ച് എസ് കടപ്ലാമറ്റം
കടപ്ലാമറ്റം: സ്വാതന്ത്ര്യ ദിനത്തിന്റെ ഭാഗമായി കുട്ടികളെ ഉൾപ്പെടുത്തി വിവിധതരം പരിപാടികൾ ഒരുക്കി സെൻറ് ആൻറണീസ് കടപ്ലാമറ്റം. സ്വാതന്ത്ര്യ ദിനത്തിൽ രാവിലെ 9 മണിക്ക് പ്രധാന അധ്യാപകൻ ബെന്നിച്ചൻ പി ഐ പതാക ഉയർത്തി. സ്കൂളിൻറെ നേതൃത്വത്തിൽ നടത്തിയ സ്മൃതിയാത്ര സ്വാതന്ത്ര്യ ദിനത്തിനും സ്വാതന്ത്ര്യ സമര സേനാനികൾക്കുമുള്ള ആദരവായി. അതോടൊപ്പം കുട്ടികളെ പങ്കെടുപ്പിച്ചുകൊണ്ട് വിവിധതരം കലാപരിപാടികൾ സ്കൂളിൽ നടത്തി ,ക്വിസ്, ദേശഭക്തി ഗാനo,പതാക നിർമ്മാണം. കുട്ടികൾക്കായി ഒരുക്കിയ വിവിധതരം മത്സരങ്ങൾക്ക് ഉള്ള സമ്മാനങ്ങൾ വിതരണം ചെയ്തു. സ്വാതന്ത്ര്യ ദിനത്തിന്റെ പ്രാധാന്യം രാജ്യത്തിൻറെ മേന്മയും വിളിച്ചോതി പ്രധാന അധ്യാപകൻ ബെന്നിച്ചൻ പി ഐ സന്ദേശം നൽകി. മിനിമോൾ തോമസ്, സോജൻ ജേക്കബ് എന്നിവർ സംസാരിച്ചു.
- പാറമട മാഫിയയിൽ നിന്നും ഞങ്ങൾക്ക് സ്വാതന്ത്ര്യം നല്കണം
കോട്ടയം :പാലായ്ക്കടുത്ത് കുടക്കച്ചിറ ഗ്രാമത്തെ മുച്ചൂടും കുടിപ്പിച്ചു കൊണ്ട് പ്രവർത്തിക്കുന്ന ജന വിരുദ്ധ പാറമടകളെ കെട്ടുകെട്ടിക്കും എന്നുറക്കെ പ്രഖ്യാപിച്ചു കൊണ്ട് കുടക്കച്ചിറ ഗ്രാമമാകെ പള്ളിത്താഴെ കവലയിൽ ഒത്തു കൂടി.ഇന്ത്യയുടെ സ്വാതന്ത്ര്യ ദിനത്തിൽ പാറമട മാഫിയയിൽ നിന്നും ഞങ്ങൾക്ക് സ്വാതന്ത്ര്യം നല്കണമെന്നാവശ്യപ്പെട്ടാണ് കുടക്കച്ചിറ പള്ളി വികാരി ഫാദർ തോമസ് മഠത്തിപ്പറമ്പിലിന്റെ നേതൃത്വത്തിൽ നാട്ടുകാർ നിരാഹാര പ്രാർത്ഥനാ യജ്‌ഞം സംഘടിപ്പിച്ചത്.
- പ്രതിഷേധ ധർണ നടത്തി
മുല്ലപെരിയാർ ജനകീയ സമിതിയുടെ ആഭിമുഖ്യത്തിൽ കോട്ടയം ഗാന്ധി പ്രതിമക്ക് മുൻപിൽ ഡാം ഡി കമ്മീഷൻ ചെയ്യണം എന്നാവശ്യപ്പെട്ടു കൊണ്ട് സ്വാതന്ത്ര്യ ദിനത്തിൽ പ്രതിഷേധ ധർണ നടത്തി. Adv. സ്റ്റീഫൻ ചാഴികാട്ട്, മഹേഷ്‌ രാഘവൻ, കെ. ആർ. സുനിൽകുമാർ, ഷിൻ ഗോപാൽ, പി. കെ. ആനന്ദനക്കുട്ടൻ, രാജേഷ് തമ്പി തുടങ്ങിയവർ നേതൃത്വം നൽകി.
- സ്വാതന്ത്ര്യ ദിനാഘോഷം നടത്തി
പാലാ: ലയൺസ് ക്ലബ് ഓഫ് പാലാ സ്‌പൈസ് വാലി രാജ്യത്തിന്റെ എഴുപത്തി എട്ടാമത് സ്വാതന്ത്ര്യ ദിനം കരൂർ ബോയ്സ് ടൗണിലെ കുട്ടികളോടൊപ്പം ആഘോഷിച്ചു. ആഗസ്റ്റ് 15 ന് രാവിലെ 8 ന് ക്ലബ് അങ്കണത്തിൽ പ്രസിഡൻറ് ശ്രീ. സുനിൽ സെബാസ്റ്റിൻ പുന്നോലിക്കുന്നേലും 8.30 ന് ബോയ്സ് ടൗണ്‍ അങ്കണത്തിൽ PDG ഡോ. സണ്ണി വി. സഖറിയാസും ദേശീയപതാക ഉയർത്തി. ഡോ. ജോർജുകുട്ടി വട്ടോത്ത് സ്വാതന്ത്ര്യദിന സന്ദേശം നൽകി. തുടർന്ന് സ്‌നേഹ വിരുന്നും സ്വാതന്ത്ര്യ ദിനത്തെ ആസ്പദമാക്കിയുള്ള ക്വിസ് മത്സരവും നടത്തി. വിജയികൾക്ക് ശീ. തോമസ്കുട്ടി ആനിത്തോട്ടം സമ്മാനങ്ങൾ വിതരണം ചെയ്തു. മദർ സുപ്പീരിയർ റവ. സിസ്റ്റർ മേഴ്‌സി എസ്.എം.എസ്, സിസ്റ്റർ ഡയസ് എസ്. എം. എസ്, അഡ്വ. പി. ജി. രമണൻ നായർ, ശ്രീ ആന്റോ ജോസ് പടിഞ്ഞാറേക്കര, ശ്രീ. വിയാനി ചാർലി, ശ്രീ. ബിജു കുര്യൻ എന്നിവർ പരിപാടികൾക്ക് നേതൃത്വം നൽകി.
- ഒരു അമ്മയെപ്പോലെ ശുശ്രുഷ ചെയ്യുന്ന അധ്യാപർ ഇന്നിന്റെ ആവശ്യം: മാർ ജോസഫ് കല്ലറങ്ങാട്ട്
സ്കൂൾ വിശ്വാസ – സന്മാർഗ പരിശീലനത്തിൻ്റെ രൂപതാ വാർഷികം മാർ ജോസഫ് കല്ലറങ്ങാട്ട് ഉദ്ഘാടനം ചെയ്യ്തു സംസാരിക്കുകയായിരുന്നു പിതാവ്. സ്കൂൾ വിശ്വാസ – സന്മാർഗ പരിശീലനത്തിൻ്റെ രൂപതാ വാർഷികവും സമ്മാന വിതരണവും 2024 ഓഗസ്റ്റ് 15 വ്യാഴാഴ്ച 2 പി.എം ന് അരുണാപുരം അൽഫോൻസിയൻ പാസ്റ്ററൽ ഇൻസ്റ്റിറ്റിട്യൂട്ടിൽ വച്ചു നടന്നു. പ്രസ്തുത മീറ്റിംഗിൽ വിശ്വാസ സന്മാർഗ പരിശീലനകേന്ദ്രം ഡയറക്ടർ ഫാ. ജോർജ്ജ് വർഗീസ് ഞാറക്കുന്നേൽ, പാലാ രൂപതാ കോർപ്പറേറ്റ് എഡ്യുക്കേഷണൽ ഏജൻസി സെക്രട്ടറി ഫാ ജോർജ്ജ് പുല്ലുകാലായിൽ എന്നിവർ പങ്കെടുത്തു.
- രഞ്ജി ട്രോഫിയിൽ; നോക്കൗട്ടിലെത്താൻ കേരളം
കേരളത്തിന് രഞ്ജി ട്രോഫി ക്രിക്കറ്റിൽ ഇത്തവണയും കരുത്തരായ എതിരാളികൾ. പഞ്ചാബും ഹരിയാനയും കർണാടകയും ബംഗാളും എല്ലാം ഉൾപ്പെടുന്ന സി ഗ്രൂപ്പിലാണ് കേരളം ഇത്തവണ ഇടം പിടിച്ചിരിക്കുന്നത്. ഒക്ടോബർ 11ന് ആരംഭിക്കുന്ന രഞ്ജി ട്രോഫിയിൽ പഞ്ചാബാണ് കേരളത്തിന്റെ ആദ്യ എതിരാളികൾ. ശുഭ്‌മാൻ ഗില്ലും അഭിഷേക് ശർമയും അടക്കമുള്ള താരങ്ങൾ പഞ്ചാബിനായി കളിക്കാനിറങ്ങിയാൽ കേരളത്തിന് വെല്ലുവിളിയാകും.
- ത്രിവർണ പതാകയുടെ ഓരോ നിറവും സൂചിപ്പിക്കുന്നത് എന്തിനെ?
ഇന്ത്യയുടെ ത്രിവർണ പതാകയ്ക്ക് ഒരു കോഡുണ്ട്. ഓരോ നിറത്തിനും ഓരോ അർത്ഥമുണ്ട്. മുകളിലെ കുങ്കുമ നിറം സൂചിപ്പിക്കുന്നത് ധീരതയെയും ത്യാഗത്തെയുമാണ്. മധ്യഭാഗത്തുള്ള വെള്ള നിറം സൂചിപ്പിക്കുന്നത് സത്യത്തെയും സമാധാനത്തെയുമാണ്. താഴെയുള്ള പച്ച നിറം സമൃദ്ധിയെ സൂചിപ്പിക്കുന്നു. മധ്യത്തിൽ 24 ആരക്കാലുകളുള്ള നീലനിറത്തിലുള്ള ചക്രം സാരാനാഥിലുള്ള അശോക സ്തംഭത്തിൽ നിന്നെടുത്തതാണ്. ഇത് ധർമ്മത്തെ സൂചിപ്പിക്കുന്നു.
- അപകടത്തിൽ പരിക്കേറ്റ പൊലീസുകാരന്റെ മകൾ മരിച്ചു
ആലുവ പെരുമ്പാവൂരിൽ കാറും സ്കൂട്ടറും കൂട്ടിയിടിച്ച് പരിക്കേറ്റ ആശുപത്രിയിലായിരുന്ന പൊലീസുകാരന്റെ മകൾ മരിച്ചു. എടത്തല പൊലീസ് സ്റ്റേഷനിലെ സിപിഒ ഷെബിൻ്റെ ഇളയ മകൾ ഐഫയാണ് മരിച്ചത്. അഞ്ചു വയസായിരുന്നു. സ്‌കൂട്ടർ ഓടിച്ച ഷെബിനും ഭാര്യയ്ക്കും മൂത്ത മകൾക്കും പരിക്കേറ്റു. അപകടത്തിന്റെ്റെ സിസിടിവി ദൃശ്യങ്ങൾ പുറത്ത് വന്നു. കഴിഞ്ഞ ഞായറാഴ്ച്ച ഉച്ചയോടെയാണ് അപകടമുണ്ടായത്.
- ബംഗ്ലാദേശിന് എതിരെയും ബുമ്ര കളിക്കില്ല
ബംഗ്ലാദേശിനെതിരായ ടെസ്റ്റ് പരമ്പരയിലും ഇന്ത്യൻ പേസർ ജസ്പ്രീത്‌ ബുമ്രയ്ക്ക് വിശ്രമം അനുവദിക്കും. ബോർഡർ ഗവാസ്കർ ട്രോഫി ടൂർണമെന്റിനായി താരത്തെ പൂർണ്ണഫിറ്റ്നസിൽ നിർത്താൻ ആണ് ഇന്ത്യൻ ടീം മാനേജ്മെന്റിന്റെ ശ്രമം. ഒക്ടോബർ 16 ന് ആരംഭിക്കുന്ന ന്യൂസിലൻഡിനെതിരായ മൂന്ന് മത്സര ടെസ്റ്റ് പരമ്പരയിലൂടെ ആകും ബുമ്ര ഇനി ഇന്ത്യ ജഴ്സിയിൽ തിരിച്ചുവരിക. ശ്രീലങ്കയ്ക്കെതിരായ പരമ്പരയിലും ബുമ്ര കളിച്ചിരുന്നില്ല.
- സ്വതന്ത്ര്യ ദിനാഘോഷ ചടങ്ങിൽ രാഹുൽഗാന്ധിയോട് അനാദരവ്; വിവാദം
ചെങ്കോട്ടയിലെ സ്വതന്ത്ര്യ ദിനാഘോഷ ചടങ്ങിൽ പ്രതിപക്ഷ നേതാവ് രാഹുൽഗാന്ധിയോട് അനാദരവ് കാണിച്ചെന്ന് ആക്ഷേപം. രാഹുൽഗാന്ധിക്ക് പിൻനിരയിൽ സീറ്റ് നൽകിയതാണ് വിമർശനത്തിന് ഇടയാക്കിയത്. പ്രതിപക്ഷ നേതാവിന് മുൻ നിരയിൽ സീറ്റ് നൽകണമെന്നതാണ് പ്രോട്ടോക്കോൾ. ഹോക്കി താരങ്ങൾക്കൊപ്പം നാലാം നിരയിലാണ് രാഹുലിന് സീറ്റ് അനുവദിച്ചിരുന്നത്. സർക്കാരിന്റെ നടപടിക്കെതിരെ രൂക്ഷ വിമർശനമാണ് ഉയരുന്നത്.
- നടി ജെന റോളണ്ട്സ് അന്തരിച്ചു
നോട്ട്ബുക്ക്, അനദർ വുമൺ എന്നീ ചിത്രങ്ങളിലൂടെ ശ്രദ്ധേയയായ അമേരിക്കൻ നടി ജെന റോളണ്ട്സ് (94) അന്തരിച്ചു. കാലിഫോർണിയയിലെ ഇന്ത്യൻ വെൽസിലെ വീട്ടിൽ വെച്ചാണ് മരണം സംഭവിച്ചത്. വാർധക്യ സഹജമായ അസുഖങ്ങൾക്കൊപ്പം ജെനയ്ക്ക് അൽഷിമഴ്സും ഉണ്ടായിരുന്നു എന്നാണ് റിപ്പോർട്ട്. കൃത്യമായ മരണകാരണം പുറത്തുവിട്ടിട്ടില്ല. 4 എമ്മികളും 2 ഗോൾഡൻ ഗ്ലോബുകളും 2 ഓസ്കാർ നോമിനേഷനുകളും നേടിയ ജെന 2015ൽ അഭിനയം അവസാനിപ്പിച്ചിരുന്നു.
- ചൂരൽമലയിൽ നിന്ന് 4 ലക്ഷം കണ്ടെത്തി ഫയർഫോഴ്സ്
ഉരുൾപൊട്ടലുണ്ടായ വയനാട്ടിലെ ചൂരൽമലയിൽ നിന്ന് നാലു ലക്ഷം രൂപയുടെ നോട്ടുകെട്ടുകൾ കണ്ടെത്തി അഗ്നി രക്ഷാസേന. വെള്ളാർമല സ്കൂളിന് പുറകിൽ നിന്നായി പുഴയോരത്തെ പാറക്കെട്ടിൽ നിന്നാണ് നോട്ടുകെട്ടുകൾ കണ്ടെത്തിയത്. പ്ലാസ്റ്റിക് കവറിൽ പൊതിഞ്ഞ നിലയിലായിരുന്നു നോട്ടുകൾ. 500ന്റെ നോട്ടുകൾ അടങ്ങിയ ഏഴ് കെട്ടുകളും 100ൻ്റെ നോട്ടുകളടങ്ങിയ അഞ്ച് കെട്ടുകളുമാണ് കണ്ടെത്തിയത്.
- നാളെ സംസ്ഥാന വ്യാപക സമരം
ബംഗാളിൽ വനിത ഡോക്‌ടറെ ബലാത്സംഗം ചെയ്ത് കൊലപ്പെടുത്തിയ സംഭവത്തിൽ കേരളത്തിലും പ്രതിഷേധം. സംസ്ഥാനത്തെ ഡോക്ടർമാർ നാളെ സമരം പ്രഖ്യാപിച്ചു. സെൻട്രൽ പ്രൊട്ടക്ഷൻ ആക്ട് നടപ്പാക്കണമെന്നാണ് ആവശ്യം. ഒപിയും വാർഡ് ഡ്യൂട്ടിയും ബഹിഷ്കരിച്ചാണ് പ്രതിഷേധം രേഖപ്പെടുത്തുക. എന്നാൽ അത്യാഹിത വിഭാഗത്തെ സമരത്തിൽ നിന്ന് ഒഴിവാക്കുമെന്നും അറിയിച്ചിട്ടുണ്ട്. പിജി റസിഡന്റ് ഡോക്‌ടർമാരും സമരത്തിന്റെ ഭാഗമാകും.
- കാവുംകണ്ടം ചെറുപുഷ്പ മിഷൻ ലീഗിന്റെ ആഭിമുഖ്യത്തിൽ സ്വാതന്ത്ര്യ ദിനം ആഘോഷിച്ചു .
കാവുംകണ്ടം: ചെറുപുഷ്പമിഷൻ ലീഗ് കാവുംകണ്ടം ശാഖയുടെ ആഭിമുഖ്യത്തിൽ ഭാരതത്തിന്റെ 78 -ാം സ്വാതന്ത്ര്യ ദിനവും പരിശുദ്ധ കന്യകാമറയത്തിൻ്റെ സ്വർഗ്ഗാരോപണ തിരുനാളും വിപുലമായി ആഘോഷിച്ചു. അലൻ തോമസ് കരിഞ്ഞാങ്കൽ മീറ്റിംഗിൽ അധ്യക്ഷത വഹിച്ചു. ജോജോ പടിഞ്ഞാറയിൽ മുഖ്യപ്രഭാഷണം നടത്തി. ഫാ. സ്കറിയ വേകത്താനം സ്വാതന്ത്ര്യ ദിന സന്ദേശം നൽകി. സൺഡേ സ്കൂളിലെ കുട്ടികൾ വിവിധ കലാപരിപാടികൾ അവതരിപ്പിച്ചു . സിസ്റ്റർ സൗമ്യാ ജോസ് വട്ടങ്കിയിൽ, ഡെന്നി ജോർജ് കൂനാനിക്കൽ, അജിമോൾ സേവ്യർ പള്ളിക്കുന്നേൽ,സൗമ്യാ സെനീഷ് മനപ്പുറത്ത് , റിസി ജോൺ ഞള്ളായിൽ, ഏദൻസെനീഷ് മനപ്പുറത്ത്, സാന്ദ്ര കൊല്ലപ്പള്ളിൽ തുടങ്ങിയവർ പരിപാടികൾക്ക് നേതൃത്വം നൽകി.
- പുരുഷന്മാരിലെ ക്യാൻസർ; മരണനിരക്ക് 93 ശതമാനത്തിലേക്ക് ഉയരാം
2050 ആകുമ്പോഴേക്കും പുരുഷന്മാർക്കിടയിലെ ക്യാൻസർ മരണങ്ങൾ 93 ശതമാനമായി വർദ്ധിക്കുമെന്ന് പഠനം. 65 വയസും അതിൽ കൂടുതലുമുള്ള പുരുഷന്മാരിലാണ് ഈ വർദ്ധനവ് കൂടുതലായി കാണപ്പെടുന്നതെന്ന് ഗവേഷകർ പറയുന്നു. അമേരിക്കൻ സൊസൈറ്റി അടുത്തിടെ പ്രസിദ്ധീകരിച്ച ലേഖനത്തിലാണ് ഇതിനെ കുറിച്ച് പറയുന്നത്. പുകവലിയും മദ്യപാനവും കാരണം ക്യാൻസർ ബാധിച്ച് മരിക്കാനുള്ള സാധ്യത പുരുഷന്മാരിൽ കൂടുതലാണെന്നും പഠനത്തിൽ പറയുന്നു.
- വൻ മേഘവിസ്ഫോടനം; മിന്നൽ പ്രളയം!
ജമ്മു കശ്മീരിലെ കുൽഗാം ജില്ലയിൽ മേഘവിസ്ഫോടനം. ദംഹൽ ഹൻജിപോറ മേഖലയിലാണ് സംഭവം. ഒരാൾ മരിക്കുകയും മൂന്ന് പേർക്ക് പരിക്കേൽക്കുകയും ചെയ്തു. മുഖ്താർ അഹമ്മദ് എന്നയാളാണ് മരിച്ചത്. പരിക്കേറ്റ മൂന്ന് പേരെ ആശുപത്രിയിലേക്ക് മാറ്റി. ആരെങ്കിലും എവിടെയെങ്കിലും കുടുങ്ങിക്കിടക്കുന്നുണ്ടോ എന്ന് കണ്ടെത്താൻ തെരച്ചിൽ പുരോഗമിക്കുകയാണ്. മേഘവിസ്ഫോടനത്തിന് പിന്നാലെയുണ്ടായ മിന്നൽ പ്രളയത്തിൽ വൻ നാശനഷ്ടങ്ങളാണ് ഉണ്ടായത്.
- സംസ്ഥാനത്ത് അടുത്ത 5 ദിവസം വ്യാപകമായ മഴയ്ക്ക് സാധ്യത
കേരളത്തിൽ അടുത്ത 5 ദിവസം വ്യാപകമായ ഇടി മിന്നലോട് കൂടിയ മഴയ്ക്ക് സാധ്യതയെന്ന് കേന്ദ്ര കാലാവസ്ഥ നിരീക്ഷണ കേന്ദ്രം. തെക്ക് കിഴക്കൻ അറബിക്കടലിനും തെക്കൻ കേരള തീരത്തിനും മുകളിലായി ചക്രവാതചുഴി രൂപപ്പെട്ടു. ഓഗസ്റ്റ് 16-ന് പത്തനംതിട്ട, ഇടുക്കി, ഓഗസ്റ്റ് 17-ന് മലപ്പുറം, കോഴിക്കോട്, വയനാട് ജില്ലകളിൽ ഓറഞ്ച് അലർട്ടാണ്. ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്.
- സംസ്ഥാനത്ത് വൈറൽ ന്യുമോണിയ പടരുന്നു; ജാഗ്രത നിർദേശം
കേരളത്തിൽ ഇൻഫ്ലുവൻസ എ വിഭാഗത്തിൽപ്പെട്ട വൈറൽ ന്യുമോണിയ പടരുന്നു. മലബാർ മേഖലയിൽ അസുഖം വലിയതോതിൽ വ്യാപിക്കുന്നുണ്ട്. എച്ച്1എൻ1, എച്ച്3 എൻ2 എന്നിവയാണ് പടരുന്നത്. ലക്ഷണങ്ങളുമായെത്തുന്ന പ്രായമായവർ, മറ്റു അസുഖങ്ങളുള്ളവർ, ശ്വാസംമുട്ടലുള്ളവർ എന്നിവരിൽ നടത്തുന്ന പരിശോധനാഫലം 90 ശതമാനവും പോസിറ്റീവാണ്. ഇതുവരെ 2034 പേർക്കാണ് രോഗം സ്ഥിരീകരിച്ചത്. 42 പേർ മരിച്ചു. 13 ദിവസത്തിനിടെ 304 പേർക്ക് രോഗം സ്ഥിരീകരിച്ചു.
- സ്വതന്ത്ര്യദിനം ആഘോഷമാക്കി കടനാട് സെൻ്റ് മാത്യൂസ്
സ്വാതന്ത്ര്യദിനം ആഘോഷമാക്കി കടനാട് സെൻ്റ് മാത്യൂസിലെ കുരുന്നുകൾ. കുട്ടികൾ സ്വന്തമായി നിർമിച്ച പതാകകളേന്തി സ്വാതന്ത്ര്യദിനറാലിയിൽ പങ്കുചേർന്നു.ഹെഡ്മിസ്ട്രസ്സ് സി.ലിനറ്റ് പതാക ഉയർത്തി. ദേശഭക്തി ഗാനാലാപനം, ക്വിസ്സ്, പ്രസംഗ മത്സരവും നടത്തി. പ്രോഗ്രാമുകൾക്ക് അധ്യാപകരും മാതാപിതാക്കളും നേതൃത്വം നൽകി.
വാർത്തകൾ വാട്സ് ആപ്പിൽ അതിവേഗമറിയാൻ ഈ ലിങ്കിൽ ക്ലിക്ക് ചെയ്ത് ജോയിൻ ചെയ്യുക
https://chat.whatsapp.com/E7UdXzZbCi1HWIDpHjZp9r
പാലാ വിഷൻ വാട്സ്ആപ്പ് ചാനൽ
https://whatsapp.com/channel/0029VaOkK347dmeU81dBvf2X
പാലാ വിഷൻ ഇൻസ്റ്റാഗ്രാം
https://www.instagram.com/pala.vision
വിഷൻ യൂ ട്യൂബ് ചാനൽ
https://youtube.com/@palavision
പാലാ വിഷൻ വെബ്സൈറ്റ്
http://pala.vision
