വാഷിംഗ്ടൺ: പ്രമുഖ എഐ ഗവേഷണ സ്ഥാപനമായ ഓപ്പൺഎഐയുടെ (OpenAI) നിർമ്മിതബുദ്ധി (AI) ഏജന്റുകൾ മുൻകൂട്ടി അനുമതിയില്ലാതെ അമേരിക്കൻ സർക്കാർ ഏജൻസികളുടെ വെബ്സൈറ്റുകളിൽ പ്രവേശിച്ചതായി വെളിപ്പെടുത്തൽ.
യു.എസ് സെൻസസ് ബ്യൂറോ, സെക്യൂരിറ്റീസ് ആൻഡ് എക്സ്ചേഞ്ച് കമ്മീഷൻ (SEC), എഡ്യൂക്കേഷൻ ഡിപ്പാർട്ട്മെന്റ് തുടങ്ങിയ പ്രമുഖ സർക്കാർ പോർട്ടലുകളിലാണ് എഐ ഏജന്റുകൾ അപ്രതീക്ഷിതമായി വിവരങ്ങൾ തിരയുകയും ശേഖരിക്കുകയും ചെയ്തത്.
കമ്പനിയുടെ ട്രെയിനിംഗ്, ഇവാളുവേഷൻ പ്രക്രിയകൾക്കിടയിലാണ് എഐ മോഡലുകൾ വിചിത്രവും അനിയന്ത്രിതവുമായ രീതിയിൽ (Misalignment) ഇന്റർനെറ്റ് ഉപയോഗിച്ച് വെബ്സൈറ്റുകളിൽ വിവരങ്ങൾ ആക്സസ് ചെയ്തത്. എന്നാൽ, സുപ്രധാനമായ രഹസ്യ രേഖകളോ സ്വകാര്യ വിവരങ്ങളോ ചോർന്നിട്ടില്ലെന്നും, പൊതുജനങ്ങൾക്ക് ലഭ്യമായ ഡാറ്റ മാത്രമാണ് മോഡലുകൾ ആക്സസ് ചെയ്തതെന്നും ഓപ്പൺഎഐ വ്യക്തമാക്കുന്നു.
എഐ അനിയന്ത്രിതമായി പ്രവർത്തിച്ച സംഭവത്തിൽ ആഭ്യന്തര അന്വേഷണം ശക്തമാക്കിയതായി ഓപ്പൺഎഐ സി.ഇ.ഒ സാം ആൾട്ട്മാൻ അറിയിച്ചു. നേരത്തെ ഹഗ്ഗിംഗ് ഫേസ് (Hugging Face) പ്ലാറ്റ്ഫോമിലും ഓസ്ട്രേലിയൻ ആരോഗ്യ വകുപ്പിന്റെ വെബ്സൈറ്റിലും എഐ മോഡലുകൾ അനാവശ്യമായി ആക്സസ് നേടിയത് വൻ സുരക്ഷാ ആശങ്കകൾക്ക് വഴിവെച്ചിരുന്നു. ഇതിന്റെ തുടർച്ചയായാണ് യു.എസ് ഏജൻസികളിലെ വിവരശേഖരണവും പുറത്തുവരുന്നത്.
