ചങ്ങനാശ്ശേരി: മാടപ്പള്ളിയിൽ ഇടഞ്ഞോടിയ ആനയെ രണ്ടു മണിക്കൂർ നീണ്ട ആശങ്കകൾക്കൊടുവിൽ മയക്കുവെടി വെച്ച് തളച്ചു. ചങ്ങനാശ്ശേരി മാടപ്പള്ളി സ്വദേശി പാട്ടത്തിനെടുത്ത് വളർത്തുന്ന ‘ഉണ്ണിപ്പിള്ളി ഗണേശൻ’ എന്ന കൊമ്പനാണാണ് ഇടഞ്ഞത്.
മദപ്പാടിനെ തുടർന്ന് ആനയെ കെട്ടുതറയിലേക്ക് മാറ്റാൻ ശ്രമിക്കുന്നതിനിടെയായിരുന്നു സംഭവം. എന്നാൽ, ആന നിശ്ചിത പുരയിടത്തിനുള്ളിൽ തന്നെ നിലയുറപ്പിച്ചതിനാൽ വലിയ രീതിയിലുള്ള നാശനഷ്ടങ്ങളോ അപകടങ്ങളോ ഒഴിവായി.
വിവരമറിഞ്ഞ് കോട്ടയത്തു നിന്നും വെറ്ററിനറി സർജൻ ഡോ. സാബു സി. ഐസക്കിന്റെ നേതൃത്വത്തിലുള്ള സംഘം സ്ഥലത്തെത്തി. തുടർന്ന് ആനയെ മയക്കുവെടി വെച്ച് വിജയകരമായി തളക്കുകയായിരുന്നു. ആനയെ പൂർണ്ണ നിയന്ത്രണത്തിലാക്കിയതോടെയാണ് നാട്ടുകാരും വനംവകുപ്പ് അധികൃതരും ആശ്വാസത്തിലായത്.
