വത്തിക്കാൻ സിറ്റി: അമേരിക്കൻ പ്രസിഡന്റ് ഡൊണാൾഡ് ട്രംപും വത്തിക്കാനും തമ്മിലുള്ള അസ്വാരസ്യങ്ങൾക്കിടയിൽ നിർണ്ണായക നീക്കവുമായി യുഎസ് സ്റ്റേറ്റ് സെക്രട്ടറി മാർക്കോ റൂബിയോ. മെയ് ഏഴിന് വത്തിക്കാനിലെ അപ്പസ്തോലിക കൊട്ടാരത്തിൽ വെച്ച് അദ്ദേഹം ലെയോ പതിനാലാമൻ പാപ്പയുമായി കൂടിക്കാഴ്ച്ച നടത്തും. വത്തിക്കാൻ വക്താക്കളാണ് ഈ കൂടിക്കാഴ്ച്ച ഔദ്യോഗികമായി സ്ഥിരീകരിച്ചത്.
മധ്യേഷ്യയിലെ സംഘർഷങ്ങളിൽ (അമേരിക്ക – ഇറാൻ – ഇസ്രായേൽ) സമാധാനം പുനഃസ്ഥാപിക്കണമെന്ന് പാപ്പ ആവർത്തിച്ച് ആഹ്വാനം ചെയ്തിരുന്നു. എന്നാൽ ഇതിനെതിരെ ട്രംപ് നടത്തിയ വിവാദ പരാമർശങ്ങൾ ആഗോളതലത്തിൽ വലിയ പ്രതിഷേധത്തിന് കാരണമായി. “ഞാൻ ഒരു രാഷ്ട്രീയക്കാരനല്ല, മറിച്ച് സുവിശേഷത്തെക്കുറിച്ച് സംസാരിക്കുന്നവനാണ്; അത് തുടരുക തന്നെ ചെയ്യും” എന്നായിരുന്നു പാപ്പയുടെ മറുപടി. ഈ തർക്കം നിലനിൽക്കെയാണ് അമേരിക്കൻ ഭരണകൂടത്തിലെ ഉന്നതനായ റൂബിയോ വത്തിക്കാനിലെത്തുന്നത്.
ട്രംപിന്റെ പരാമർശങ്ങൾ സൃഷ്ടിച്ച നയതന്ത്ര വിള്ളലുകൾ പരിഹരിക്കാനാണ് റൂബിയോയുടെ ഈ സന്ദർശനം ലക്ഷ്യമിടുന്നത്. സമാധാന ചർച്ചകളിൽ വത്തിക്കാനുള്ള സ്വാധീനം കണക്കിലെടുത്ത് നിലവിലെ വിദേശനയങ്ങളിൽ മാറ്റം വരുത്താൻ ഈ കൂടിക്കാഴ്ച്ച സഹായിക്കുമെന്ന് രാഷ്ട്രീയ നിരീക്ഷകർ കരുതുന്നു.
