പാലക്കാട് : കൃഷിക്കാർക്കായി രാജ്യത്തെ ആദ്യത്തെ ക്ഷേമനിധി ബോർഡ് – സംസ്ഥാന കർഷക ക്ഷേമനിധി ബോർഡ് –
വേരുറപ്പിക്കും മുൻപു തന്നെ തടസ്സങ്ങളുടെ നൂലാമാലകളിൽ. കൃഷിക്കാർക്ക് വലിയ പ്രതീക്ഷ നൽകിയ പ്രഖ്യാപനങ്ങളും നിയമവുമായി നിലവിൽ വന്ന ക്ഷേമനിധി ബോർഡാണ് മുന്നോട്ടു പോകാനാകാതെ വലയുന്നത്. കൃഷിയുടെയും കൃഷിക്കാരന്റെയും പേരിലുള്ള മറ്റു ചില ബോർഡുകളുടെ നിലനിൽപ്പിന് പുതിയ സ്ഥാപനം വെല്ലുവിളിയാകുമെന്നു നേരത്തെ നടന്ന ചർച്ചകളിൽ ചിലർ ആശങ്ക ഉയർത്തിയിരുന്നു. ഈ ആശങ്കയും ബോർഡിന്റെ നിലവിലെ സ്ഥിതിയും കൂട്ടിയ വായിക്കുന്നവരാണ് കൃഷിക്കാരും ബോർഡിനുവേണ്ടി രാപകൽ അധ്വാനിച്ചവരും ആശിച്ചവരും. എവിടെയുമില്ലാത്ത വിധം ആനുകൂല്യങ്ങളും സംവിധാനങ്ങളുമായി നിലവിൽവന്ന സർക്കാരിന്റെ അഭിമാനപദ്ധതിയാണ് ഇഴഞ്ഞു നീങ്ങുന്നത്. പ്രഥമ ഘടകമായ കർഷകർക്കുളള പെൻഷൻ ഉൾപ്പെടെയുളള സ്കീമുകൾ സ്ഥാപനം ആരംഭിച്ച് രണ്ടുവർഷമായിട്ടും സർക്കാർ അംഗീകരിച്ചിട്ടില്ല. ബോർഡിനാവശ്യമായ ഫണ്ട് കണ്ടെത്താനുള്ള നടപടികളും ഇതുവരെ ആരംഭിച്ചില്ല. ഇവയ്ക്കായി പലവട്ടം ബോർഡ് അധികൃതർ മന്ത്രിമാരെ മാറിമാറി സമീപിച്ചിട്ടും എഴുതിയിട്ടും ഫലമുണ്ടായില്ല. മനസുമടുത്ത് സ്ഥാനമൊഴിയുന്നതുപോലും ആലോചിക്കുന്ന സാഹചര്യത്തിലാണ് ഇവരെന്നാണ് ഒടുവിലത്തെ വിവരം.
