തിരുവനന്തപുരം: നഗരഹൃദയത്തിൽ നടത്തിയ മിന്നൽ പരിശോധനയിൽ വൻ ലഹരിവേട്ട. 105 ഗ്രാം എം.ഡി.എം.എയുമായി രണ്ട് യുവാക്കളെ എക്സൈസ് നാർക്കോട്ടിക് സ്ക്വാഡ് പിടികൂടി. പടിഞ്ഞാറേകോട്ടയിൽ വെച്ച് ബൈക്കിൽ ലഹരിമരുന്ന് കടത്താൻ ശ്രമിക്കവേയാണ് ആകാശ്, അരവിന്ദ് എന്നിവർ എക്സൈസിന്റെ പിടിയിലായത്.
കഴിഞ്ഞ മൂന്നാഴ്ചയ്ക്കിടെ തലസ്ഥാന നഗരിയിൽ നടക്കുന്ന മൂന്നാമത്തെ കൊമേഴ്സ്യൽ അളവിലുള്ള (Commercial Quantity) എം.ഡി.എം.എ പിടികൂടലാണിത്. ഇതിന് മുൻപ് ഇരുവരുടെയും പേരിൽ ലഹരിമരുന്ന് കേസുകളൊന്നും നിലവിലില്ലെന്നും ആദ്യമായാണ് ഇവർ എക്സൈസ് സംഘത്തിന്റെ പിടിയിലാകുന്നതെന്നും ഉദ്യോഗസ്ഥർ വ്യക്തമാക്കി.
വിൽപനയ്ക്കായി കൊണ്ടുവന്ന ലഹരിമരുന്നിന്റെ ഉറവിടത്തെക്കുറിച്ചും ഇതിന് പിന്നിൽ പ്രവർത്തിച്ച വൻകിട റാക്കറ്റിനെക്കുറിച്ചും എക്സൈസ് വിശദമായ അന്വേഷണം ആരംഭിച്ചിട്ടുണ്ട്. നഗര കേന്ദ്രങ്ങൾ കേന്ദ്രീകരിച്ച് ലഹരി വിൽപന നടത്തുന്ന സംഘങ്ങൾക്കെതിരെ പരിശോധന ശക്തമാക്കുമെന്നും അധികൃതർ അറിയിച്ചു.
