കുറവിലങ്ങാട്: കുറവിലങ്ങാട് മേജർ ആർക്കി എപ്പിസ്കോപ്പൽ മർത്ത്മറിയം ആർച്ച് ഡീക്കൻ തീർത്ഥാടന ദേവാലയത്തിലെ പരിശുദ്ധ കന്യകാമറിയത്തിന്റെ ജനനത്തിരുനാളിനോടനുബന്ധിച്ചുള്ള എട്ടുനോമ്പ് തിരുനാളിന്റെ നാലാം ദിനം ഭക്തിസാന്ദ്രമായി.
മുട്ടുചിറ ഇടവകയുടെ നേതൃത്വത്തിൽ മുത്തിയമ്മ തീർത്ഥാടനം നടന്നു. പ്രാർത്ഥനകളും ജപമാലയും ഗാനങ്ങളും നിറഞ്ഞ അന്തരീക്ഷത്തിൽ നിരവധി വിശ്വാസികൾ തീർത്ഥാടനത്തിൽ പങ്കെടുത്തു.
കാളികാവ് ഇടവകയുടെ നേതൃത്വത്തിലും മുത്തിയമ്മ തീർത്ഥാടനം സംഘടിപ്പിച്ചു. വിവിധ പ്രദേശങ്ങളിൽനിന്നെത്തിയ വിശ്വാസികൾ മുത്തിയമ്മയുടെ മാധ്യസ്ഥ്യം തേടി പ്രാർത്ഥനകളോടെ തീർത്ഥാടനത്തിൽ അണിനിരന്നു.
നാലാം ദിനത്തിലെ പ്രധാന ആത്മീയ ചടങ്ങുകളിലൊന്നായി ആഘോഷമായ ജപമാല പ്രദക്ഷിണവും നടന്നു. വിശ്വാസികൾ കൈകളിൽ ജപമാലയേന്തി പ്രാർത്ഥനാഗാനങ്ങളോടെ പ്രദക്ഷിണത്തിൽ പങ്കുചേർന്നു. ദേവാലയ പരിസരം ഭക്തിനിർഭരമായ കാഴ്ചയായി മാറി.
എട്ടുനോമ്പിന്റെ ഓരോ ദിനവും പിന്നിടുമ്പോൾ മുത്തിയമ്മയുടെ അനുഗ്രഹം തേടിയെത്തുന്ന തീർത്ഥാടകരുടെ എണ്ണവും വർധിക്കുകയാണ്. വിശ്വാസത്തിന്റെയും പ്രാർത്ഥനയുടെയും കൂട്ടായ്മയുടെയും മനോഹരമായ അനുഭവമായി നാലാം ദിനാചരണവും മാറി.
