പശ്ചിമേഷ്യയിൽ യുദ്ധസമാനമായ സാഹചര്യങ്ങളും സുരക്ഷാ വെല്ലുവിളികളും തുടരുന്നതിനിടയിലാണ് മേഖലയിലെ പ്രബല ശക്തികളായ സൗദി അറേബ്യ, പാകിസ്ഥാൻ, തുർക്കി എന്നിവർ ചേർന്നുള്ള പുതിയ സൈനിക കൂട്ടുകെട്ട് രൂപപ്പെട്ടിരിക്കുന്നത്. സൗദി അറേബ്യയിലെ മക്കയിൽ വെച്ച് നടന്ന ഉച്ചകോടിയിൽ മൂന്ന് രാജ്യങ്ങളുടെയും തലവന്മാർ പുതിയ സഖ്യ കരാറിൽ ഒപ്പുവെച്ചു.
അടുത്തിടെ ഇറാൻ, ഹൂതി വിഭാഗങ്ങൾ നടത്തുന്ന ആക്രമണങ്ങളും, മേഖലയിൽ യു.എസ് നൽകിവരുന്ന സുരക്ഷാ ഉറപ്പുകളിലെ അനിശ്ചിതത്വവുമാണ് ഇത്തരമൊരു സംയുക്ത പ്രതിരോധ കരാറിലേക്ക് മൂന്ന് രാജ്യങ്ങളെയും നയിച്ചത്. തുർക്കിയുടെ പ്രതിരോധ ശേഷിയും, പാകിസ്ഥാന്റെ സൈനിക അനുഭവ സമ്പത്തും അണുശക്തിയും, സൗദിയുടെ സാമ്പത്തിക നയതന്ത്ര കരുത്തും കൂട്ടിയിണക്കുന്നതാണ് ഈ കരാർ.
മേഖലയിൽ ഇസ്രായേൽ, ഇറാൻ എന്നിവ ഉയർത്തുന്ന ഭീഷണികൾക്കെതിരെ പരസ്പര സുരക്ഷയും എയർ ഡിഫൻസ് ഉൾപ്പെടെയുള്ള പ്രതിരോധ സംവിധാനങ്ങളും ഉറപ്പാക്കാൻ ഈ കരാറിലൂടെ സാധിക്കുമെന്നാണ് വിലയിരുത്തൽ. കൂടാതെ, വ്യാവസായിക-പ്രതിരോധ മേഖലകളിലും വ്യാപാര ഇടനാഴികളിലും മൂന്ന് രാജ്യങ്ങളും തമ്മിലുള്ള സഹകരണം ഇത് കൂടുതൽ ശക്തമാക്കും.
