കേരള ലേബർ മൂവ്മെന്റിന്റെ (KLM) നേതൃത്വത്തിൽ സംഘടിപ്പിക്കുന്ന രണ്ടുദിവസത്തെ സംസ്ഥാനതല ഡയറക്ടേഴ്സ് ആൻഡ് പ്രീസ്റ്റ് മീറ്റിന് കല്ലേറ്റുംകര പി.എ.സി.എസ് (PACS Kallettumkara) ഹാളിൽ പ്രൗഢോജ്ജ്വലമായ തുടക്കമായി. ഇരിങ്ങാലക്കുട രൂപത മെത്രാൻ ബിഷപ്പ് മാർ പോളി കണ്ണൂക്കാടൻ മീറ്റിന്റെ ഔദ്യോഗിക ഉദ്ഘാടനം നിർവ്വഹിച്ചു. 2026 ജൂൺ 9, 10 (ചൊവ്വാ, ബുധൻ) തീയതികളിലാണ് ഈ സുപ്രധാന സമ്മേളനം നടക്കുന്നത്. ജൂൺ 9-ാം തീയതി ചൊവ്വാഴ്ച രാവിലെ 11:00 മണിക്ക് രജിസ്ട്രേഷനോടെയാണ് പരിപാടികൾ ആരംഭിച്ചത്.
കെ.എൽ.എം സംസ്ഥാന പ്രസിഡന്റ് ശ്രീ. ജോസ് മാത്യു ഊക്കൻ സമ്മേളനത്തിന്റെ അധ്യക്ഷപദവി അലങ്കരിച്ചു. ചടങ്ങിൽ കെ.എൽ.എം സംസ്ഥാന ജനറൽ സെക്രട്ടറി ശ്രീ. ഡിക്സൺ മണീക് സ്വാഗതം ആശംസിക്കുകയും, കെ.എൽ.എം സംസ്ഥാന ഡയറക്ടർ റെവ. ഫാ. അരുൺ വലിയതാഴത്ത് ആമുഖ പ്രസംഗം നടത്തുകയും ചെയ്തു.
ഇരിങ്ങാലക്കുട രൂപത വികാരി ജനറൽ റെവ. മോൺ. ജോസ് മാളിയേക്കൽ സമ്മേളനത്തിൽ അനുഗ്രഹപ്രഭാഷണം നടത്തി. തുടർന്ന് ഡബ്ല്യു.ഐ.എഫ് (WIF) ഡയറക്ടർ റെവ. ഫാ. ജോർജ്ജ് തോമസ് നിരപ്പുകാലായിൽ മുഖ്യപ്രഭാഷണം നിർവ്വഹിച്ചു. ചടങ്ങിൽ കെ.എൽ.എം ഇരിങ്ങാലക്കുട രൂപത ഡയറക്ടർ റെവ. ഫാ. ജോസ് പുല്ലൂപ്പറമ്പിൽ ആശംസകൾ അർപ്പിച്ചു സംസാരിച്ചു. കെ.എൽ.എം സംസ്ഥാന ട്രഷറർ ശ്രീ. തോമസ് മാത്യു ചടങ്ങിൽ നന്ദി രേഖപ്പെടുത്തി. വിവിധ സെഷനുകളിലായി പ്രമുഖ വ്യക്തിത്വങ്ങൾ പങ്കെടുന്ന സമ്മേളനം ഇന്ന് (ബുധനാഴ്ച) സമാപിക്കും
