പാലാ: കേരളത്തിൽ ബിജെപി ഭരിക്കുന്ന അപൂർവം പഞ്ചായത്തുകളിലൊന്നായ പാലാ നിയോജക മണ്ഡലത്തിലെ മുത്തോലി പഞ്ചായത്തിൽ കഴിഞ്ഞ അഞ്ചു വർഷം കൊണ്ട് 26 കോടി 77 ലക്ഷം രൂപയുടെ വികസന പ്രവർത്തനങ്ങൾ നടപ്പിലാക്കിയതായി പഞ്ചായത്ത് പ്രസിഡന്റ് രഞ്ജിത്ത് ജി. മീനാഭവൻ അറിയിച്ചു. ഇതിൽ 11 കോടി രൂപ പഞ്ചായത്തിന്റെ തനത് ഫണ്ടിൽ നിന്നാണ് ചെലവഴിച്ചത്. 4 കോടി 68 ലക്ഷം രൂപ മിച്ചമുള്ള കോട്ടയം ജില്ലയിലെ ഏക പഞ്ചായത്താണ് മുത്തോലി എന്നതും അഭിമാനകരമാണെന്നും അദ്ദേഹം കൂട്ടിച്ചേർത്തു.
മീഡിയ അക്കാദമിയുടെ ‘എന്റെ നാട്, എന്റെ നാടിന്റെ വികസനം’ കാമ്പയിനിൽ പങ്കെടുത്ത് സംസാരിക്കുകയായിരുന്നു അദ്ദേഹം. മികച്ച പ്രവർത്തനത്തിന് ലഭിച്ച അംഗീകാരമായി രഞ്ജിത്ത് ജി. മീനാഭവനെ ബിജെപി സംസ്ഥാന കമ്മിറ്റിയിലും അംഗമാക്കിയിട്ടുണ്ട്.
ആരോഗ്യമേഖലയിൽ വൻ കുതിച്ചുചാട്ടം
ആരോഗ്യമേഖലയിൽ 2 കോടി 20 ലക്ഷം രൂപ ചെലവഴിച്ചു. മരുന്നുകൾക്കായി മാത്രം ഒരു വർഷം 12 ലക്ഷം രൂപ വിനിയോഗിച്ചു. ‘സാന്ത്വനം പദ്ധതി’ നടപ്പിലാക്കിയത് മറ്റൊരു പഞ്ചായത്തിനും ചെയ്യാനാവാത്ത നേട്ടമാണ്. 60 വയസ്സിന് മുകളിലുള്ളവരുടെ വീടുകളിൽ ചെന്ന് പ്രഷർ, ഷുഗർ, കൊളസ്ട്രോൾ എന്നിവ സൗജന്യമായി പരിശോധിച്ച് മരുന്ന് എത്തിക്കുന്ന പദ്ധതിയാണിത്. ആംബുലൻസ് സൗകര്യം ജനകീയമാക്കിയതുവഴി ജനങ്ങൾക്ക് ആശുപത്രികളിൽ സൗജന്യമായി പോകുവാൻ കഴിഞ്ഞു. വൃദ്ധർക്കായി കട്ടിൽ മുതൽ കണ്ണട വരെ നൽകി.
കാർഷിക-ക്ഷീര മേഖലകളിലെ നേട്ടങ്ങൾ
കാർഷിക മേഖലയിൽ ഇക്കോഷോപ്പ്, നെൽകൃഷി വികസനം എന്നിവയ്ക്കായി 70 ലക്ഷം രൂപ ചെലവഴിച്ചു. ക്ഷീരകർഷകർക്ക് സമാനതകളില്ലാത്ത ആനുകൂല്യങ്ങളാണ് നൽകിയത്. സൊസൈറ്റിയിൽ പാൽ അളക്കുന്നവർക്ക് മാത്രം ആനുകൂല്യം നൽകിയിരുന്ന രീതി മാറ്റി, അളക്കാത്തവർക്കും അളക്കുന്നവർക്കും സൗജന്യമായി കാലിത്തീറ്റയും മരുന്നുകളും ലഭ്യമാക്കി. ഹരിതകർമ്മ സേനയ്ക്ക് വരെ വാഹനം നൽകാൻ പഞ്ചായത്തിന് കഴിഞ്ഞു.
കുടിവെള്ളവും ഭവന പദ്ധതികളും
പ്രധാനമന്ത്രിയുടെ ജലജീവൻ മിഷൻ പദ്ധതി കാര്യക്ഷമമായി നടപ്പിലാക്കി 45 പദ്ധതികളിലായി എല്ലാവർക്കും കുടിവെള്ളം എത്തിച്ചു. ഇതിനായി 3 കോടി രൂപ പ്രത്യേകമായി ലഭ്യമാക്കി. നിലവിൽ ഒന്നര കോടിയുടെ പദ്ധതി പൂർത്തിയായി വരുന്നു. പഞ്ചായത്തിൽ മുഴുവൻ കുടിവെള്ളം എത്തിക്കാൻ കഴിഞ്ഞത് വലിയ നേട്ടമാണെന്ന് പ്രസിഡന്റ് പറഞ്ഞു.
ലൈഫ് ഭവന പദ്ധതിയിൽ അർഹതയുള്ള എല്ലാവർക്കും വീട് ലഭ്യമാക്കി. ഇതിനായി ഹഡ്കോയിൽ നിന്ന് വായ്പ വരെ എടുക്കേണ്ടി വന്നു. ഗർഭിണികൾക്കും കുട്ടികൾക്കുമായി നിരവധി ക്ഷേമ പദ്ധതികൾ നടപ്പിലാക്കി. പ്രധാനമന്ത്രിയുടെ ഇൻഷുറൻസ് പോലുള്ള അഭിമാന പദ്ധതികളും പഞ്ചായത്ത് കാര്യക്ഷമമായി നടപ്പിലാക്കുന്നുണ്ട്.
സാമൂഹിക ഇടപെടലുകളും പുതിയ പദ്ധതികളും
- വീട്ടമ്മമാർക്കായി നടത്തിയ പാചക മത്സരം വൻ വിജയമായിരുന്നു.
- യോഗ പരിശീലനം കാര്യക്ഷമമാക്കി.
- മറ്റ് പഞ്ചായത്തിൽ നടപ്പിലാക്കാത്ത ഭരണഘടനാ ശിൽപ്പി ഡോ. ബി. ആർ. അംബേദ്കറുടെ പ്രതിമ പഞ്ചായത്തിൽ സ്ഥാപിക്കാൻ തീരുമാനിച്ചു.
- വൃദ്ധജനങ്ങൾക്കായി നടത്തിയ ടൂർ പ്രോഗ്രാം പലർക്കും ജീവിതത്തിൽ ആദ്യത്തെ അനുഭവമായി. ഇതുവരെ വീടിന് പുറത്തിറങ്ങാത്തവർ ആദ്യമായി ടൂറിസ്റ്റ് ബസ്സിൽ കയറിയതും ബോട്ടിൽ യാത്ര ചെയ്തതും പലരുടെയും സന്തോഷ കണ്ണീരിന് കാരണമായി.
“ഞങ്ങൾ ബിജെപി ആണെങ്കിലും വികസനത്തിൽ രാഷ്ട്രീയം നോക്കിയിട്ടില്ല. എല്ലാവരിലേക്കും വികസനം എത്തിച്ചു. ജനങ്ങളുടെ സന്തോഷ കണ്ണീരാണ് ഞങ്ങളുടെ പ്രതിഫലം,” രഞ്ജിത്ത് ജി. മീനാഭവൻ വ്യക്തമാക്കി.
