കോട്ടയം റവന്യൂ ജില്ലാ ശാസ്ത്ര, ഗണിതശാസ്ത്ര, സാമൂഹ്യശാസ്ത്ര, പ്രവൃത്തിപരിചയ, ഐ.ടി മേളകൾക്ക് അതിരമ്പുഴയിൽ തുടക്കമായി. അതിരമ്പുഴ സെന്റ് അലോഷ്യസ് ഹയർ സെക്കൻഡറി സ്കൂളിൽ നടന്ന ചടങ്ങിൽ ജലസേചന ഭവന നിർമ്മാണ വകുപ്പ് മന്ത്രി മോൻസ് ജോസഫ് ശാസ്ത്രോത്സവത്തിന്റെ ഉദ്ഘാടനം നിർവഹിച്ചു.
സുരേഷ് കുറുപ്പ് എം.എൽ.എ അധ്യക്ഷത വഹിച്ച യോഗത്തിൽ ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ് മുഖ്യപ്രഭാഷണം നടത്തി. ലോഗോ ഡിസൈനിങ് മത്സരത്തിലെ വിജയികൾക്കുള്ള സമ്മാനങ്ങൾ ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ പി.കെ. വൈശാഖ് വിതരണം ചെയ്തു. ജനറൽ കൺവീനറും കോട്ടയം വിദ്യാഭ്യാസ ഉപഡയറക്ടറുമായ ഹണി ജി. അലക്സാണ്ടർ സ്വാഗതവും റിസപ്ഷൻ കമ്മിറ്റി കൺവീനർ പ്രദീപ്കുമാർ വി. നന്ദിയും പറഞ്ഞു. വിവിധ ജനപ്രതിനിധികളും വിദ്യാഭ്യാസ ഉദ്യോഗസ്ഥരും ചടങ്ങിൽ ആശംസകൾ അർപ്പിച്ചു.
നവംബർ 10, 11 തീയതികളിലായി നടക്കുന്ന ശാസ്ത്രോത്സവത്തിൽ 13 സബ് ജില്ലകളിൽ നിന്നായി 4500-ഓളം വിദ്യാർത്ഥികളാണ് മാറ്റുരയ്ക്കുന്നത്. സെന്റ് അലോഷ്യസ് എച്ച്.എസ്.എസിന് പുറമെ അതിരമ്പുഴ സെന്റ് മേരീസ് ഗേൾസ് ഹൈസ്കൂൾ, സെന്റ് അലോഷ്യസ് എൽ.പി സ്കൂൾ, സെന്റ് മേരീസ് എൽ.പി സ്കൂൾ എന്നിവിടങ്ങളിലാണ് വിവിധ മത്സരവേദികൾ ഒരുക്കിയിരിക്കുന്നത്.
ബുധനാഴ്ച വൈകുന്നേരം 3.30-ന് നടക്കുന്ന സമാപന സമ്മേളനം വൈക്കം എം.എൽ.എ കെ. ബിനിമോൻ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പിന്റെ അധ്യക്ഷതയിൽ നടക്കുന്ന ചടങ്ങിൽ ഏറ്റുമാനൂർ ബ്ലോക്ക് പഞ്ചായത്ത് പ്രസിഡന്റ് ജയ്മോൻ കരീമഠം വിജയികൾക്കുള്ള സമ്മാനദാനം നിർവഹിക്കും.
