ബെംഗളൂരുവിൽ നിന്ന് ലഖ്‌നൗവിലേക്ക് പുറപ്പെട്ട ഇൻഡിഗോ വിമാനത്തിൽ വിമാനം ഹൈജാക്ക് ചെയ്യുമെന്ന വ്യാജ ഭീഷണി സന്ദേശം കണ്ടെത്തി. വിമാനത്തിലെ ടോയ്‌ലെറ്റിനുള്ളിൽ നിന്നാണ് കൈയെഴുത്തുപ്രതിയിലുള്ള ഭീഷണി കുറിപ്പ് കണ്ടെത്തിയത്. തുടർന്ന് വിമാനം അടിയന്തരമായി ബെംഗളൂരു കെംപെഗൗഡ അന്താരാഷ്ട്ര വിമാനത്താവളത്തിലേക്ക് തന്നെ തിരിച്ചിറക്കുകയായിരുന്നു.
വിമാനത്തിലുണ്ടായിരുന്ന 178 യാത്രക്കാരെയും സുരക്ഷിതമായി പുറത്തിറക്കി കടുത്ത പരിശോധനകൾ നടത്തി.
വിമാനം ടേക്ക് ഓഫ് ചെയ്ത് 30 മിനിറ്റിനുള്ളിൽ ഒരു യാത്രക്കാരനാണ് ടോയ്‌ലെറ്റിൽ നിന്ന് കുറിപ്പ് കണ്ടതും ക്യാബിൻ ക്രൂവിനെ വിവരമറിയിച്ചതും. “കൃത്യമായി 6.30-ന് വിമാനം ഹൈജാക്ക് ചെയ്യപ്പെടും, ഇത് അവഗണിച്ചാൽ അനന്തരഫലം നേരിടേണ്ടി വരും” എന്നായിരുന്നു കുറിപ്പിൽ ഉണ്ടായിരുന്നത്.
പൈലറ്റ് ഉടൻ തന്നെ എയർ ട്രാഫിക് കൺട്രോളുമായി (ATC) ബന്ധപ്പെട്ട് ബെംഗളൂരുവിലേക്ക് വിമാനം തിരിച്ചിറക്കാൻ തീരുമാനിക്കുകയായിരുന്നു.
സുരക്ഷാ ഏജൻസികൾ 90 മിനിറ്റോളം നടത്തിയ സമഗ്രമായ പരിശോധനയ്ക്ക് ശേഷം ഭീഷണി വ്യാജമാണെന്ന് സ്ഥിരീകരിച്ചു.
ഭീഷണി കുറിപ്പ് വെച്ചത് വിമാനത്തിലുണ്ടായിരുന്ന ആരോ തന്നെയാണെന്ന് സംശയിക്കുന്നതായും സംഭവത്തിൽ പൊലീസ് കൂടുതൽ അന്വേഷണം നടത്തുകയാണെന്നും അധികൃതർ വ്യക്തമാക്കി.
