പാലാ: കാടുകളും പരിസ്ഥിതിയും സംരക്ഷിക്കേണ്ടത് അനിവാര്യമാണെങ്കിലും, അതിന്റെ പേരിൽ മനുഷ്യവാസ മേഖലകളെ തകർക്കുന്നതും തലമുറകളായി ജീവിക്കുന്ന ജനങ്ങളെ വഴിയാധാരമാക്കുന്നതും ശരിയായ നയമല്ലെന്ന് പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട്. മലയോര മേഖലകളായ മേലുകാവ്, തീക്കോയി, പൂഞ്ഞാർ അടക്കമുള്ള പ്രദേശങ്ങളിലെ ജനങ്ങൾ നേരിടുന്ന രൂക്ഷമായ ആശങ്കകൾ മുൻനിർത്തി സംസാരിക്കുകയായിരുന്നു അദ്ദേഹം.
“വന്യജീവികളുടെയും വനത്തിന്റെയും സംരക്ഷണം പോലെ തന്നെ പ്രധാനമാണ് മനുഷ്യന്റെ ജീവനും സ്വത്തിനും സംരക്ഷണം നൽകുന്നത്. പരിസ്ഥിതി സംരക്ഷണത്തിന്റെ പേരിൽ ജനങ്ങളുടെ ആവാസവ്യവസ്ഥ തകർക്കുന്ന നടപടികൾ അംഗീകരിക്കാൻ കഴിയില്ല,” എന്ന് ബിഷപ്പ് വ്യക്തമാക്കി.
മലയോര കർഷകരുടെയും സാധാരണക്കാരുടെയും ജീവനും സ്വത്തിനും കൃഷിക്കും പൂർണ്ണ സംരക്ഷണം ഉറപ്പാക്കുന്ന തരത്തിലുള്ള ശാശ്വത പരിഹാരങ്ങളാണ് സർക്കാരിന്റെയും വനം വകുപ്പിന്റെയും ഭാഗത്തുനിന്ന് ഉണ്ടാകേണ്ടതെന്നും അദ്ദേഹം ആഹ്വാനം ചെയ്തു.
