കോണ്ഗ്രസിലെ മുഖ്യമന്ത്രി ചര്ച്ചകള്ക്കിടെ ഡല്ഹിയില് മാത്യു കുഴല്നാടന്-കെ സി വേണുഗോപാല് കൂടികക്കാഴ്ച. കെ സി വേണുഗോപാലിന്റെ ഡല്ഹിയിലെ വസതിയിലായിരുന്നു കൂടിക്കാഴ്ച.
കൂടിക്കാഴ്ചയ്ക്ക് ശേഷം മാധ്യമങ്ങളെ കാണാതെ പിറകുവശത്തെ ഗേറ്റിലൂടെയാണ് മാത്യു മടങ്ങിയത്. രാവിലെ 9 മണിയോടെയാണ് മാത്യു കുഴല്നാടന് കെ സിയുടെ വസതിയിലെത്തിയത്. 10.30 വരെ ഇരുവരുടേയും കൂടിക്കാഴ്ച നീണ്ടു. ഇതേസമയത്ത് തന്നെ മാധ്യമങ്ങള് കെ സി വേണുഗോപാലിന്റെ വസതിയ്ക്ക് മുന്നില് മാത്യു കുഴല്നാടനെ പ്രതീക്ഷിച്ച് നിന്നെങ്കിലും പിന്വാതിലിലൂടെയായിരുന്നു മാത്യുവിന്റെ മടക്കം.
ഈ സംഭവവികാസങ്ങള് കേരളത്തിലെ മുഖ്യമന്ത്രി ചര്ച്ചകള് സജീവമായി നടക്കുന്നതിനിടെ പലവിധ അഭ്യൂഹങ്ങള്ക്കും വഴിവച്ചിട്ടുമുണ്ട്. പിന്നീട് കേരളഹൗസില് വന്ന് മാത്യു കുഴല്നാടനെ മാധ്യമങ്ങള് സമീപിച്ചിരുന്നെങ്കിലും അപ്പോഴും കൂടിക്കാഴ്ചയെക്കുറിച്ച് പ്രതികരിക്കാന് അദ്ദേഹം തയ്യാറായില്ല.
