ടെഹ്റാൻ: ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനെ നരകത്തിലേക്ക് അയക്കുമെന്നും കടുത്ത പ്രത്യാഘാതങ്ങൾ നേരിടേണ്ടി വരുമെന്നും മുന്നറിയിപ്പുമായി ഇറാന്റെ മുതിർന്ന സുരക്ഷാ തലവനും എക്സ്പീഡിയൻസി ഡിസർണ്മെന്റ് കൗൺസിൽ അംഗവുമായ മൊഹ്സെൻ റെസായി. മേഖലയിലെ സംഘർഷങ്ങൾ വർദ്ധിച്ചുവരുന്ന പശ്ചാത്തലത്തിലാണ് ഇറാൻ മുൻ വിപ്ലവ ഗാർഡ്സ് (IRGC) കമാൻഡർ കൂടിയായ റെസായിയുടെ കടുത്ത പരാമർശം.
ഇസ്രായേലിന്റെ ആക്രമണങ്ങൾക്കും നീക്കങ്ങൾക്കും തക്കതായ മറുപടി നൽകാൻ ഇറാൻ സജ്ജമാണെന്ന് അദ്ദേഹം വ്യക്തമാക്കി. പശ്ചിമേഷ്യയിൽ ഇസ്രായേൽ നടത്തുന്ന നീക്കങ്ങൾക്ക് കനത്ത വില നൽകേണ്ടി വരുമെന്നും, തിരിച്ചടി വളരെ തീവ്രമായിരിക്കുമെന്നും റെസായി മുന്നറിയിപ്പ് നൽകി.
മേഖലയിൽ ഇറാനും ഇസ്രായേലും തമ്മിലുള്ള പിരിമുറുക്കം രൂക്ഷമായി തുടരുന്നതിനിടെയാണ് ഇറാനിയൻ സുരക്ഷാ വൃത്തങ്ങളിൽ നിന്ന് ഈ പ്രസ്താവന പുറത്തുവന്നിരിക്കുന്നത്. ഇസ്രായേലിന്റെ ഏത് നീക്കത്തെയും പ്രതിരോധിക്കാൻ രാജ്യം സജ്ജമാണെന്നും അദ്ദേഹം കൂട്ടിച്ചേർത്തു.
