സംസ്ഥാനത്തെ മുതിർന്ന പൗരന്മാരുടെ സംരക്ഷണവും ക്ഷേമവും ഉറപ്പാക്കുന്നതിനായി കൂടുതൽ ശക്തമായ വ്യവസ്ഥകൾ ഉൾക്കൊള്ളുന്ന ‘മുതിർന്ന പൗരന്മാരുടെ സംരക്ഷണവും ക്ഷേമവും (ഭേദഗതി) ബില്ല്’ നിയമസഭയുടെ നിലവിലെ സമ്മേളനത്തിൽ സർക്കാർ അവതരിപ്പിക്കും. വയോജനങ്ങൾക്കെതിരെയുള്ള അതിക്രമങ്ങൾ തടയുന്നതിനും അവകാശങ്ങൾ സംരക്ഷിക്കുന്നതിനും കടുത്ത ശിക്ഷാനടപടികളാണ് പുതിയ നിയമനിർമ്മാണത്തിൽ ഉൾപ്പെടുത്തിയിരിക്കുന്നത്.
പ്രധാന ശിക്ഷാ വ്യവസ്ഥകൾ:
3 വർഷം തടവും പിഴയും: മുതിർന്ന പൗരന്മാരെ ശാരീരികമായോ മാനസികമായോ ഉപദ്രവിക്കുക, പരിചരിക്കാതെ ഉപേക്ഷിക്കുക, വീടുകളിൽ നിന്ന് ഇറക്കിവിടുക എന്നിവ 3 വർഷം വരെ തടവുശിക്ഷ ലഭിക്കാവുന്ന കുറ്റകൃത്യമായി മാറും. സാമ്പത്തിക പിഴയും ഒപ്പം ഈടാക്കും.
സ്വത്ത് തട്ടിയെടുക്കൽ: മാതാപിതാക്കളുടെയോ മുതിർന്ന പൗരന്മാരുടെയും സ്വത്ത് വ്യാജ രേഖകൾ വഴിയോ ഭീഷണിപ്പെടുത്തിയോ കൈക്കലാക്കാൻ ശ്രമിച്ചാൽ സമാനമായ ശിക്ഷ ഉറപ്പാക്കും.
സ്വത്ത് കൈമാറ്റം റദ്ദാക്കാം: സ്വത്ത് എഴുതി വാങ്ങിയ ശേഷം പരിചരണം നിഷേധിച്ചാൽ, ആ സ്വത്ത് കൈമാറ്റം റദ്ദാക്കുന്നതിനായി വയോജനങ്ങൾക്ക് ട്രൈബ്യൂണലിനെ സമീപിക്കാം.
സ്റ്റേഷനുകളിൽ പ്രത്യേക നോഡൽ ഓഫീസർ
വയോജനങ്ങളുടെ പരാതികൾ വേഗത്തിൽ തീർപ്പാക്കാനും സുരക്ഷ ഉറപ്പാക്കാനുമായി സംസ്ഥാനത്തെ എല്ലാ പോലീസ് സ്റ്റേഷനുകളിലും സബ് ഇൻസ്പെക്ടർ (SI) തലത്തിലുള്ള പ്രത്യേക നോഡൽ ഓഫീസറെ നിയമിക്കും. പരാതികളിൽ കേസ് രജിസ്റ്റർ ചെയ്ത് നിശ്ചിത ദിവസങ്ങൾക്കകം തീർപ്പുണ്ടാക്കാൻ വയോജന സംരക്ഷണ ട്രൈബ്യൂണലുകളുടെ പ്രവർത്തനം കൂടുതൽ കാര്യക്ഷമമാക്കുമെന്നും ബില്ലിൽ നിർദ്ദേശമുണ്ട്.
