തിരുവനന്തപുരം: വി.ഡി. സതീശന്റെ നേതൃത്വത്തിലുള്ള യു.ഡി.എഫ് സർക്കാർ ഇന്ന് അധികാരത്തിലേറിയിട്ട് ആറ് മാസം പിന്നിടുന്നു. പ്രിയദർശിനി പദ്ധതി, ഓപ്പറേഷൻ തൂഫാൻ, വയോജന വകുപ്പ് രൂപീകരണം എന്നിവ സർക്കാരിന്റെ പ്രധാന നേട്ടങ്ങളായി വിലയിരുത്തപ്പെടുമ്പോൾ, അടിക്കടിയുണ്ടാകുന്ന വിവാദങ്ങളും മുന്നണിക്കുള്ളിലെ കൂട്ടുത്തരവാദിത്തമില്ലായ്മയും സർക്കാരിന് കടുത്ത തലവേദന സൃഷ്ടിക്കുകയാണ്.
പ്രകടനപത്രികയിലെ പ്രധാന വാഗ്ദാനങ്ങളായ ഉമ്മൻ ചാണ്ടി ഇൻഷുറൻസ് പദ്ധതി, കോളേജ് വിദ്യാർത്ഥിനികൾക്കുള്ള സാമ്പത്തിക സഹായം എന്നിവ ഇതുവരെ നടപ്പാക്കാൻ സർക്കാരിന് സാധിച്ചിട്ടില്ല. ഇതിന് പുറമെ, മതിയായ കൂടിയാലോചനകളില്ലാതെ മുഖ്യമന്ത്രി ഏകപക്ഷീയമായി തീരുമാനങ്ങളെടുക്കുന്നുവെന്ന പരാതി മന്ത്രിമാർ തന്നെ പരസ്യമായി ഉന്നയിക്കുന്നത് അസാധാരണമായ പ്രതിസന്ധിക്കാണ് വഴിവെച്ചിരിക്കുന്നത്. ഗുരുവായൂർ ദേവസ്വം ബോർഡിലേക്കുള്ള അംഗങ്ങളുടെ പട്ടികയിൽ ഒരു വിഭാഗം മന്ത്രിമാർ ഒപ്പിടാത്തതും മന്ത്രിസഭാ യോഗത്തിൽ ഈ വിഷയം ഉയർന്നുവരാനുള്ള സാധ്യതയും സർക്കാരിനെ പ്രതിരോധത്തിലാക്കുന്നു.
അതിനിടെ, വിവാദമായ രണ്ട് വൈദ്യുതി കരാറുകൾ സർക്കാരിന് വലിയ തിരിച്ചടിയായിട്ടുണ്ട്. കരാറുകളിൽ കോടികളുടെ അഴിമതി ആരോപിച്ച് പ്രതിപക്ഷം ജുഡീഷ്യൽ അന്വേഷണം ആവശ്യപ്പെട്ട് രംഗത്തെത്തിക്കഴിഞ്ഞു. മന്ത്രിമാർക്കായി 24 പുതിയ കാറുകൾ വാങ്ങാൻ തീരുമാനിച്ചതും, എം.എൽ.എമാർക്കും മന്ത്രിമാർക്കും ശമ്പളം വർധിപ്പിച്ചതും, ഐപാഡുകൾ വാങ്ങിയതും പൊതുസമൂഹത്തിൽ വലിയ ചർച്ചകൾക്കും വിമർശനങ്ങൾക്കും ഇടയാക്കിയിട്ടുണ്ട്.
















