അമേരിക്കയ്ക്കെതിരെ ഭീഷണിയുമായി ഇസ്ലാമിക് റെവല്യൂഷണറി ഗാര്ഡ് കോര്പ്സ് (ഐആര്ജിസി). ഹോര്മുസിലെ അമേരിക്കന് ഉപരോധം തുടര്ന്നാല് ചെങ്കടലിലേയും പേര്ഷ്യന് ഗള്ഫിലേയും ഒമാന് കടലിടുക്കിലെയും കപ്പല് ഗതാഗതം തടയുമെന്നാണ് ഐആര്ജിസിയുടെ ഭീഷണി.
ഇറാനിയന് തുറമുഖങ്ങള്ക്ക് നേരെയുള്ള ഉപരോധം അമേരിക്ക അവസാനിപ്പിക്കണമെന്നും അമേരിക്കയുടെ ഉപരോധം നിയമവിരുദ്ധമെന്നും ഐആര്ജിസി വിമര്ശിച്ചു. ഉപരോധം തുടരുന്നത് വെടിനിര്ത്തല് കരാറിന്റെ ലംഘനമായി കണക്കാക്കുമെന്നും ഐആര്ജിസി വിമര്ശിച്ചു. ചെങ്കടലില് ഹൂതികളെ ഉപയോഗിച്ചായിരിക്കും കപ്പല് ഗതാഗതം തടയുകയെന്നാണ് ഇസ്ലാമിക് റെവല്യൂഷണറി ഗാര്ഡിന്റെ ഭീഷണി.
ഇറാനില് കൂടുതല് സമ്മര്ദം ചെലുത്തുന്നതിനായി കൂടുതല് സൈന്യത്തെ പശ്ചിമേഷ്യയിലേക്ക് അയയ്ക്കാന് അമേരിക്ക തയ്യാറെടുക്കുന്നതായി കഴിഞ്ഞ ദിവസം വാഷിങ്ടണ് പോസ്റ്റ് റിപ്പോര്ട്ട് ചെയ്തിരുന്നു. ഇറാനുമേല് സമ്മര്ദം കടുപ്പിക്കാന് അമേരിക്ക തിരക്കിട്ട നീക്കങ്ങള് നടത്തുന്ന പശ്ചാത്തലത്തിലാണ് ഇസ്ലാമിക് റെവല്യൂഷണറി ഗാര്ഡിന്റെ ഭീഷണി.
