ഇന്ത്യ-യു.എസ് വ്യാപാര കരാറുമായി മുന്നോട്ടുപോകുന്ന കേന്ദ്ര സർക്കാരിനെതിരെ അതിശക്തമായ സമര മുന്നറിയിപ്പുമായി അഖിലേന്ത്യാ കിസാൻ സഭ (AIKS). വ്യാപാര കരാർ വഴി അമേരിക്കയ്ക്ക് നൽകുന്ന ഇളവുകൾ രാജ്യത്തെ കാർഷിക മേഖലയെ പൂർണ്ണമായി തകർക്കുമെന്നും വൻകിട കോർപ്പറേറ്റുകൾക്ക് കാർഷികരംഗത്ത് വലിയ സ്വാധീനം ചെലുത്താൻ വഴിവെക്കുമെന്നും എ.ഐ.കെ.എസ് വ്യക്തമാക്കി.
അമേരിക്കയിൽ സർക്കാരിൽ നിന്ന് വൻതോതിൽ സബ്‌സിഡി ലഭിക്കുന്ന കാർഷിക ഉൽപ്പാദകരുമായി മത്സരിക്കാൻ ഇന്ത്യയിലെ സാധാരണ കർഷകർക്ക് സാധിക്കില്ലെന്ന് സംഘടന ചൂണ്ടിക്കാട്ടി.
വിവരങ്ങൾ പാർലമെന്റിൽ നിന്ന് മറച്ചുവെക്കുന്നു; റൂബിയോയുടെ പ്രസ്താവനയ്ക്ക് പിന്നാലെ പ്രതിഷേധം
ഇന്ത്യയിലുള്ള യു.എസ് സ്റ്റേറ്റ് സെക്രട്ടറി മാർക്കോ റൂബിയോയുമായി ചേർന്ന് കരാറിന് അന്തിമ രൂപം നൽകാനുള്ള ചർച്ചകൾ നടക്കുന്ന പശ്ചാത്തലത്തിലാണ് കർഷക സംഘടന പ്രതിഷേധം കടുപ്പിച്ചത്. കരാറുമായി ബന്ധപ്പെട്ട സുപ്രധാന വിവരങ്ങൾ സർക്കാർ പാർലമെന്റിൽ നിന്ന് മറച്ചുവെക്കുകയാണെന്ന് കിസാൻ സഭ കുറ്റപ്പെടുത്തി.
അമേരിക്കയുടെ പാൽ ഉൽപ്പന്നങ്ങൾ ഇന്ത്യയിൽ വിൽക്കാനുള്ള ആവശ്യമാണ് കരാറിലെ അവസാന തടസ്സമെന്നും കരാർ അന്തിമഘട്ടത്തിലാണെന്നും മാർക്കോ റൂബിയോ പ്രസ്താവിച്ചിരുന്നു. സാമ്രാജ്യത്വ യജമാനന്മാരെ പ്രീതിപ്പെടുത്താൻ ആർ.എസ്.എസ് – ബി.ജെ.പി നേതൃത്വത്തിലുള്ള കേന്ദ്ര സർക്കാർ ഏതറ്റം വരെയും പോകുമെന്നതിന്റെ തെളിവാണ് ഈ നീക്കമെന്നും എ.ഐ.കെ.എസ് വിമർശിച്ചു.
ഇറക്കുമതി തീരുവ വെട്ടിക്കുറച്ചതിനെതിരെയും കടുത്ത അമർഷം
ഖാരിഫ് സോയാബീൻ വിളവെടുപ്പ് ആരംഭിക്കുന്ന നിർണ്ണായക സമയത്ത് അസംസ്‌കൃത സോയാബീൻ എണ്ണയുടെയും പാം ഓയിലിന്റെയും ഇറക്കുമതി തീരുവ 10 ശതമാനത്തിൽ നിന്ന് 5 ശതമാനമായി കുറച്ച കേന്ദ്ര സർക്കാർ തീരുമാനത്തെയും അഖിലേന്ത്യാ കിസാൻ സഭ ശക്തമായി വിമർശിച്ചു.
