അമേരിക്കൻ വിമാനവാഹിനി കപ്പൽ യു.എസ്.എസ് തിയൊഡർ റൂസ്വെൽറ്റ് ഇന്ത്യൻ മഹാസമുദ്രത്തിലെത്തി
ടെഹ്റാൻ: പശ്ചിമേഷ്യയിൽ സംഘർഷം രൂക്ഷമാകുന്നതിനിടെ ഹോർമുസ് കടലിടുക്കിൽ എണ്ണക്കപ്പലിന് നേരെ വീണ്ടും ആക്രമണം. ഒമാനിലെ ഖസബിന് സമീപമുണ്ടായ ആക്രമണത്തിൽ കപ്പലിന്റെ എഞ്ചിൻ റൂമിന് തീപിടിച്ചു. കപ്പലിലുണ്ടായിരുന്ന ജീവനക്കാർ സുരക്ഷിതരാണ്. ഈ മാസം ഇതുവരെ ഹോർമുസ് കടലിടുക്കിൽ 11 എണ്ണക്കപ്പലുകൾക്ക് നേരെയാണ് ആക്രമണമുണ്ടായിരിക്കുന്നത്.
അതേസമയം, മേഖലയിലെ സൈനിക വിന്യാസം ശക്തമാക്കുന്നതിന്റെ ഭാഗമായി അമേരിക്കൻ വിമാനവാഹിനി കപ്പലായ യു.എസ്.എസ് തിയൊഡർ റൂസ്വെൽറ്റ് ഇന്ത്യൻ മഹാസമുദ്രത്തിൽ യു.എസ് സെൻട്രൽ കമാൻഡിന്റെ പരിധിയിലെത്തി. കപ്പലിന്റെ ചിത്രങ്ങൾ അമേരിക്കൻ സെൻട്രൽ കമാൻഡ് പുറത്തുവിട്ടിട്ടുണ്ട്. ഇതിന് പുറമെ അമേരിക്കയുടെ മൂന്ന് വിമാനവാഹിനി കപ്പലുകൾ കൂടി പശ്ചിമേഷ്യയിൽ എത്തിയിട്ടുണ്ട്.
ഇറാൻ ഇലക്ട്രോണിക് യുദ്ധനീക്കം സജീവമാക്കുന്നതിനിടയിലാണ് അമേരിക്കൻ നാവികസേനയുടെ ഈ നീക്കം. ഇലക്ട്രോണിക് വാർഫെയറിലൂടെ അമേരിക്കയുടെ ഒൻപതാമത്തെ ഡ്രോണിന്റെയും നിയന്ത്രണം സ്വന്തമാക്കിയതായി ഇറാൻ സൈന്യം അവകാശപ്പെട്ടു. അമേരിക്കയുടെ ‘എം.ക്യു.എം 170’ (MQM 170) ഡ്രോൺ പിടിച്ചെടുത്തതായാണ് ഇറാന്റെ അവകാശവാദം.
മറുവശത്ത്, ബാബ് അൽ മന്ദേബ് കടലിടുക്കിന്റെ നിയന്ത്രണം പിടിച്ചെടുത്തതായി ഹൂത്തി വിമതരും അവകാശപ്പെട്ടു. 24 മണിക്കൂറിനുള്ളിൽ സൗദി അറേബ്യയ്ക്ക് നേരെ 88 മിസൈൽ ആക്രമണങ്ങൾ നടത്തിയതായും ഹൂത്തികൾ അറിയിച്ചു. ഇതിന് തിരിച്ചടിയായി ഹൂത്തി കേന്ദ്രങ്ങൾക്ക് നേരെ യെമൻ സർക്കാർ കനത്ത വ്യോമാക്രമണം നടത്തി.















