പാലാ: നാളെ തുറന്നു നൽകുന്ന പാലാ നെല്ലിയാനിയിലെ സിവിൽ സ്റ്റേഷൻ അനക്സ് മന്ദിരത്തിൽ അടുത്ത ഘട്ടത്തിൽ കൂടുതൽ സൗകര്യങ്ങൾ താമസംവിനാ സജ്ജീകരിക്കുമെന്ന് ജില്ലാ കളക്ടർ ചേതൻ കുമാർ മീണ അറിയിച്ചു. ഓഫീസുകളിൽ എത്തുന്നവർക്കായി ഇരിപ്പിട സൗകര്യം, പൊതു ശൗചാലയം, ജീവനക്കാർക്കും ഓഫീസിലെത്തുന്നവർക്കും സർക്കാർ വാഹനങ്ങൾക്കുമായി വാഹന പാർക്കിംഗ് ഷെഡ് എന്നിവയാണ് സജ്ജമാക്കുന്നത്.
സിവിൽ സ്റ്റേഷൻ മന്ദിരത്തിലെത്തിയ ജില്ലാ കളക്ടർക്ക് പൊതുപ്രവർത്തകരായ ജയ്സൺ മാന്തോട്ടം, ആനന്ദ് ചെറുവള്ളി എന്നിവർ നൽകിയ നിവേദനത്തിനുള്ള മറുപടിയിലാണ് കളക്ടർ ഇക്കാര്യം വ്യക്തമാക്കിയത്. കെട്ടിടത്തിന്റെ രണ്ടും മൂന്നും നിലകളുടെ നിർമ്മാണ ആവശ്യത്തിനായി സർക്കാരിലേക്ക് ശുപാർശ സമർപ്പിക്കുമെന്നും കളക്ടർ അറിയിച്ചു
ജില്ലാ കളക്ടറുടെ കർശന നിലപാടിനെ തുടർന്നാണ് ഇപ്പോൾ ഓഫീസ് മാറ്റത്തിന് നടപടിയായതെന്നും പ്രദേശവാസികളുടെ നന്ദി അറിയിക്കുന്നതായും നിവേദകർ പറഞ്ഞു.
