ലണ്ടന്: ഇംഗ്ലണ്ടിലെയും വെയിൽസിലെയും മാരക രോഗം ബാധിച്ചവർക്ക് വൈദ്യസഹായത്തോടെ ദയാവധം അനുവദിക്കുന്നതിനുള്ള ബിൽ ബ്രിട്ടീഷ് പാർലമെന്റ് തള്ളി. അധോസഭയായ ഹൗസ് ഓഫ് കോമൺസിൽ നടന്ന നാല് മണിക്കൂർ നീണ്ട രൂക്ഷമായ വാദപ്രതിവാദങ്ങൾക്കൊടുവിൽ 286 പ്രതിനിധികൾ ബില്ലിനെതിരെ വോട്ട് ചെയ്തു. ഇതോടെ രണ്ട് വർഷമായി തുടരുന്ന പാർലമെന്ററി ചർച്ചകൾക്കാണ് വിരാമമായത്.
ആറ് മാസത്തിൽ താഴെ മാത്രം ആയുസ്സ് പ്രവചിക്കപ്പെട്ട രോഗികൾക്ക് രണ്ട് ഡോക്ടർമാരുടെയും വിദഗ്ധ സമിതിയുടെയും അനുമതിയോടെ ജീവിതം അവസാനിപ്പിക്കാൻ അനുവാദം നൽകുന്നതായിരുന്നു നിയമനിർമ്മാണം. ബില്ലിനെതിരെ കത്തോലിക്കാ സഭയും ആംഗ്ലിക്കൻ സഭയും ശക്തമായി രംഗത്തുവന്നിരുന്നു. നിയമനിർമ്മാണം തെറ്റാണെന്നും വൻ അപകടസാധ്യതയുള്ളതാണെന്നും വെസ്റ്റ്മിൻസ്റ്റർ ആർച്ച്ബിഷപ്പ് വ്യക്തമാക്കുകയുണ്ടായി.
രാഷ്ട്രീയ പാർട്ടി വ്യത്യാസമില്ലാതെ മനഃസാക്ഷിക്കനുസരിച്ച് വോട്ട് ചെയ്യാൻ അംഗങ്ങൾക്ക് അവസരം നൽകിയ വോട്ടെടുപ്പിൽ നിന്ന് ബ്രിട്ടീഷ് പ്രധാനമന്ത്രി ആൻഡി ബർണാം വിട്ടുനിന്നു. ദയാവധത്തിന് പകരം പാലിയേറ്റീവ് കെയർ സംവിധാനങ്ങൾ മെച്ചപ്പെടുത്തുകയാണ് വേണ്ടതെന്ന് അദ്ദേഹം അഭിപ്രായപ്പെട്ടു. ദൈവീക ദാനമായ മനുഷ്യജീവൻ സ്വാഭാവിക അന്ത്യം വരെയും സംരക്ഷിക്കപ്പെടണമെന്ന സഭയുടെ ധാർമ്മിക നിലപാടിന് വലിയ ഊർജ്ജം നൽകുന്നതാണ് പാർലമെന്റിന്റെ ഈ തീരുമാനം.
