തിരുവനന്തപുരം: സംസ്ഥാനത്തെ കടുത്ത വൈദ്യുതി പ്രതിസന്ധിയെത്തുടർന്ന് ഏർപ്പെടുത്തിയ ലോഡ് ഷെഡിങ്ങിൽ പരാതികൾ ഒഴിവാക്കാൻ ഏകീകൃത സമയക്രമം പാലിക്കാൻ കെ.എസ്.ഇ.ബി നിർദ്ദേശം നൽകി. ഉപഭോക്താക്കൾക്ക് തടസ്സമില്ലാത്ത ആസൂത്രണത്തിനായി ഒരാഴ്ച ഒരേ സമയത്ത് തന്നെ പവർകട്ട് നടപ്പിലാക്കണമെന്നാണ് പുതിയ നിർദ്ദേശം.
ഇതനുസരിച്ച്, ഓരോ പ്രദേശത്തും പവർകട്ട് ഏർപ്പെടുത്തുന്ന സമയം ഉപഭോക്താക്കൾക്ക് ഇന്ന് മുതൽ മുൻകൂട്ടി അറിയാൻ സാധിക്കും. വൈദ്യുതി വിച്ഛേദിക്കുന്നതിന് ഒന്നര മണിക്കൂർ മുൻപ് ഉപഭോക്താക്കളുടെ രജിസ്റ്റർ ചെയ്ത മൊബൈൽ നമ്പറുകളിലേക്ക് മുന്നറിയിപ്പ് സന്ദേശം (SMS) ലഭിക്കുന്ന സംവിധാനമാണ് ഇന്ന് നിലവിൽ വരുന്നത്. തിരുവനന്തപുരം നഗരത്തിൽ നടപ്പിലാക്കിയ പരീക്ഷണം വിജയകരമായതിനെ തുടർന്നാണ് പദ്ധതി സംസ്ഥാന വ്യാപകമാക്കുന്നത്.
