പാലാ: ബഹ്റൈനിൽ ബാത്ത് ടബ്ബിൽ വീണ് ദാരുണമായി കൊല്ലപ്പെട്ട മൂന്നു വയസുകാരൻ ധ്യാൻ സൂര്യയുടെ സംസ്കാര ചടങ്ങുകൾ ഇന്ന് ഉച്ചയ്ക്ക് 2.30-ന് മൂഴൂർ സെന്റ് മേരീസ് പള്ളിയിൽ നടക്കും. പാലാ സ്വദേശിനി അൽഫോൻസ് ജോസിന്റെ (മേഘ) ഏകമകനാണ് ധ്യാൻ സൂര്യ.
അമ്മ അടുക്കളയിൽ ജോലി ചെയ്തുകൊണ്ടിരുന്ന സമയത്ത്, അബദ്ധത്തിൽ ബാത്ത് ടബ്ബിലെ വെള്ളത്തിൽ വീഴുകയായിരുന്നു. ഉടൻ തന്നെ കുട്ടിയെ അടുത്തുള്ള സൽമാനിയ മെഡിക്കൽ കോംപ്ലക്സിൽ എത്തിച്ച് തീവ്രപരിചരണ വിഭാഗത്തിൽ ചികിത്സ നൽകിയെങ്കിലും ജീവൻ രക്ഷിക്കാനായില്ല.
നാട്ടിലായിരുന്ന ധ്യാനെ ഓണം ആഘോഷിക്കുന്നതിനായി നാല് ദിവസം മുമ്പാണ് ബഹ്റൈനിലേക്ക് കൊണ്ടുവന്നത്. കുട്ടിയുടെ അമ്മ മേഘ ബഹ്റൈൻ കേരളീയ സമാജം അംഗമാണ്. പ്രവാസി മലയാളികളെയും നാട്ടുകാരെയും ഒന്നടങ്കം ആഴത്തിൽ ദുഃഖത്തിലാഴ്ത്തിയ അപകടത്തിന് ശേഷം മൃതദേഹം നാട്ടിലെത്തിച്ചാണ് ഇന്ന് സംസ്കാരം നടത്തുന്നത്.
