കോട്ടയം : ഓണത്തോടനുബന്ധിച്ച് ഭക്ഷ്യോത്പന്നങ്ങളുടെ വിലക്കയറ്റവും പൂഴ്ത്തിവയ്പ്പും തടയുന്നതിനും ഗുണനിലവാരവും കൃത്യമായ അളവും ഉറപ്പാക്കുന്നതിനും ജില്ലയില് നിരീക്ഷണവും പരിശോധനയും കര്ശനമാക്കാന് ജില്ലാ കളക്ടര് ചേതന്കുമാര് മീണ ഉദ്യോഗസ്ഥര്ക്ക് നിര്ദേശം നല്കി.
പൊതു വിതരണം, ലീഗല് മെട്രോളജി, ഭക്ഷ്യ സുരക്ഷ, റവന്യു, പോലീസ് എന്നീ വകുപ്പുകളിലെ ഉദ്യോഗസ്ഥര് ഉള്പ്പെടുന്ന സ്ക്വാഡുകളുടെ പ്രവര്ത്തനം വിലയിരുത്തുന്നതിനായി ചേര്ന്ന യോഗത്തില് സംസാരിക്കുകയായിരുന്നു അദ്ദേഹം.
താലൂക്ക് തലത്തിലുള്ള സ്ക്വാഡുകള് അവധി ദിവസങ്ങളില് ഉള്പ്പെടെ പരിശോധന നടത്തും.അനധികൃത വിലവര്ധന, പൂഴ്ത്തിവയ്പ്പ്, കരിഞ്ചന്ത തുടങ്ങിയ ക്രമക്കേടുകള് കണ്ടെത്തിയാല് കര്ശന നടപടി സ്വീകരിക്കും. ഗുണനിലവാരമില്ലാത്തതോ മായം കലര്ന്നതോ ആയ അരി, ഭക്ഷ്യ ധാന്യങ്ങള്,പച്ചക്കറികള്, മറ്റു ഭക്ഷ്യ ഉത്പന്നങ്ങള് എന്നിവ വില്പ്പന നടത്തുന്നില്ലെന്ന് ഉറപ്പാക്കും.
